༈ ཁེ་ཉིན་ཞོགས་པའི་རྨི་ལམ་བཏང་པའི་སྒྲུང་ཞིག་བཤད་སྙིང་འདོད་དེ།
གསུང་ཆོས་ཚུགས་པ་ལྟ་བུ་ང་དང་གྲྭ་རོགས་འགའ་ཞིག་ཐེག་ཆེན་བཙུག་ལག་ཁང་གི་མཐའ་སྟེ་ལྕགས་རའི་ཕྱི་ལ་བསྡད་ཀྱང་ལྕགས་ར་གོག་གྲབས་བྱེད་ཀྱི་འདུག་པས་ལྕགས་རའི་ནང་དུ་ཚུད་ཙམ་ཞིག་ལ་བསྡད་སོང་།
དེ་ནས་ཆར་ཐིག་རེ་གཉིས་རྒྱབ་སོང་བས་གནམ་ལ་བལྟས་པས་རྦད་དེ་སྨུག་པ་འཁྲིག་ནས་སྨུག་པ་མ་གཏོགས་མཐོང་ཡེ་གང་ཡང་མིན་འདུག
ངས་གྲྭ་རོགས་ཚོ་ལ་རྩེད་མོ་དང་སྦྲག་ལག་པས་སྨུག་པ་དབྲལ་བའི་ལྟངས་ཁ་དང་ཕུས་སྨུག་པ་གཏོར་ཁུལ་བྱས་པའི་མཚམས་ཤིག་ན་སྨུག་པ་རལ་བའི་བར་ན་སྐར་ཆེན་ལྟ་བུའི་འོད་ཆེན་ཞིག་ཤར་བས་ཉི་མ་ཤར་སོང་ལབ་པས་སྐར་ཆེན་ནི་ཡུས་ཙམ་ལས་མ་ཤར་བས་རོགས་པ་ཚང་མ་བགད་མོས་རིལ།
།དེ་འདྲའི་བར་གཅིག་ལ་༸གོང་ས་མཆོག་འཕེབས་ནས་ཙུག་ལག་ཁང་བསྐོར་བ་གཅིག་གནང་སྟེ་བཞུགས། ངས་ཀྱང་ཕེབས་ལམ་ལ་མཇལ་ཁ་ཡག་པོ་ཞུས་པ་ཡིན།
།དེ་དུས་བཙུག་ལག་ཁང་ཡང་མཆོད་རྫས་བསམ་གྱི་མི་ཁྱབ་པས་ཁེངས་ནས་དུས་རྒྱུན་དང་མི་འདྲ་བ་འདུག
།དེ་འདྲའི་དུས་གཅིག་ལ་ཐང་སྟོང་གྲུབ་ཐོབ་ཐུགས་ཐིག་གི་བཀའ་བརྒྱད་བདེ་འདུས་ལྟ་བུ་བཀའ་བརྒྱད་ལས་བྱང་ཆུང་བ་ལྟ་བུ་ཞིག་གྱེར་བའི་རྣམ་པ་བྱུང་།
།ང་སྡོད་ས་གྲལ་མཐའ་ནས་དད་པ་འདི་ལྟར་སྐྱེས་སྔར་སློབ་དཔོ་ཆེན་པོ་པདྨས་དེ་ལྟ་བུའི་བཀའ་བརྒྱད་ཀྱི་དཀྱིལ་འཁོར་དེ་འདྲ་ཞལ་ཕྱེ་ནས་བོད་འབངས་བདེ་ལ་བཀོད་ད་ལྟ་ཡང་༸གོང་ས་མཆོག་སྟོན་འཁོར་རྣམས་ཀྱི་བོད་འབངས་ཀྱི་བདེ་སྐྱིད་ཀྱི་དེ་ལྟར་གནང་བཞིན་འདུག་བསམ་ནས་དད་པ་ལྷག་པར་འཕེལ་བའི་མོས་ལ་ཕྱོགས་ག་ས་ནས་ལྷ་ཁོག་བརླམས་མང་པོ་བྱུང་བའི་ཟིང་གི་ངང་༸གོང་ས་མཆོག་གི་གཡོན་ཕྱོགས་དུས་རྒྱུན་མི་དྲག་སྡོད་ས་ནས་རྒྱ་མིའི་ལྷ་རེད་ཟེར་བ་གཉིས་ཕེབས་ནས་གཅིག་གིས་ནི་གསལ་སྣང་མ་བྱུང་ཀྱང་རལ་གྲི་ཐོགས་ནས་༸གོང་ས་མཆོག་འཁྲིས་སུ་རྒྱུག་ནས་རྒོལ་བའི་རྣམ་པ་བྱུང་བས་ལམ་སེང་སྐུ་འཁོར་དྲག་བཙན་ཞིག་གིས་པང་དུ་ཀྱག་ནས་ཕྱི་རོལ་ལ་འབུད་དེ་དང་མཉམ་དུ་རྒྱ་འདྲེ་གཞན་ཀྱང་མི་གཞན་ཞིག་གིས་ཕུད་སོང་།
།དེ་ནས་གང་མཚམས་སོང་ནས་༸གོང་ས་མཆོག་ཉིད་ཀྱང་བྱིན་ཕེབས་ནས་ལྷ་ཕེབས་པའི་རྣམ་པ་བྱུང་ང་ཡང་མདུན་དུ་སླེབས་འདུག་འོན་ཀྱང་ངའི་མདུན་དུ་༸གོང་ས་མཆོག་གི་རྣམ་པ་མེད་པར་མི་ཞིག་ལ་ཐུགས་ཀྱི་རྒྱལ་པོ་ཕེབས་འདུག་ང་རང་གི་བསམ་པར་འདི་ཐུགས་རྒྱལ་ཡིན་པས་ལུང་གནང་ཨ་ཡོང་བསམ་ཡང་ཧར་སྒྲའི་ངང་ལུང་འདི་ལྟར་གསུངས་ཀྱི་།
ཁྱེད་རྣམས་དམ་ཚིག་ཡག་པོ་སྲུང་འདུག ཊུ་ཤི་ཏར་བར་ལམ་དཀའ་ངལ་ཕྲད་པ་ནི་དམ་ཚིག་ཉམས་པའི་སྐྱོན་མ་ཡིན།
ངའི་ཡེ་ཤེས་ཀྱི་མིག་གཅིག་དེས་མིག་འདི་གཉིས་བརྒྱུད་ནས་ཐམས་ཅད་ཤེས་ཟེར་བའི་མུར་ང་རང་གཉིད་སད།
དེ་དུས་ང་རང་ཡང་སྤོབས་པ་ཆེན་པོས་ཐུགས་རྒྱལ་ཁོག་ཞུགས་བྱེད་བཞིན་པ་དེ་ལ་མིག་ཆེར་བལྟས་ཤིང་ལུང་རྣ་མཆོག་གིས་ལྷང་ངེར་ཉན་བཞིན་འདུག
།ཧ་ཧ་སྒྲུང་སྙན་པོ་བྱུང་ངམ། ཁྱེད་ལྷ་སྒྲུང་དགའ་པོ་ཡོད་པ་རྣམས་ཀྱི་ཆེད་དུ་བསམ་ནས་བཤད།
།སྙན་པོ་བྱུང་བའི་རེ་བ་ཡོད། །སང་ཉིན་ནི་རྒྱ་གར་ལྷོ་ཕྱོགས་དགའ་ལྡན་ལ་གསུང་ཆོས་དབུ་འཛུགས་གནང་གི་རེད། །ང་རང་འདི་ནས་སྨོན་ལམ་འདེབས་སོ།།
།།
