 |
| པཎ་གྲུབ་གཉིས་ཚོགས་ན་རོ་པ་ལ་ཕྱག་འཚལ་ལོ། |
༈ ༡༥ ༡༢ ༡༢ དགོངས་གཅིག་བྱད་སེམས་གནད་བསྡུས་ཀྱི་འཚོམས་༢༤ལས་རྡོ་རྗེའི་གསུང་༡པོ།
སྙིང་རྗེ་དང་བྱང་ཆུབ་ཀྱི་སེམས་ཐ་དད་ཡིན། བྱ་བ་ནི་དུས་རྒྱུན་བཞིན་ལྷག་བས་འདྲེན་ནུས་ཀྱི་སྙིང་རྗེ་ཆེན་པོ་ནི་བྱང་སེམས་ཀྱི་རྒྱུ་ཡིན་པས་གཅིག་ཏུ་ག་ལ་འགྱུར།
།འོན་ཏེ་སྐབས་རེ་སྟོང་ཉིད་སྙིང་རྗེ་ལྟ་བུ་བྱང་སེམས་ལ་ལྟ་བུ་ཕྱེ་སྟེ་ཤེས་དགོས་འཇིག་རྟེན་གསུམ་མགོན་ཀྱིས།
དུས་གསུམ་སངས་རྒྱས་ཐམས་ཅད་ཀྱི། །སྟོང་ཉིད་སྙིང་རྗེ་ཞེས་བྱ་བ། །བྱང་ཆུབ་སེམས་གཉིས་འདྲེས་པ་ཡིན།
།ཞེས་སོ། །༈ རྡོ་རྗེའི་གསུང་༢པ། བྱང་ཆུབ་སེམས་དཔའི་༼དཔའ་༽ཚུལ་འཁྲིམས་ཀྱི་བསྡོམ་པའི་རྟེན་ཅན།
བྱ་བ་ལ་ཞལ་སྔ་ནས། སོ་སོར་ཐར་པའི་སྡོམ་པ་ནི། བྱང་ཆུབ་སེམས་དཔའི་སྡོམ་པ་མ་སྐྱེས་པ་སྐྱེ་བའི་རྟེན་དང་།
སྐྱེས་པ་གནས་པའི་རྟེན་དང་། གནས་པ་གོང་ནས་གོང་དུ་བོགས་འདོན་པ་སྟེ་མཐར་ཐུག་པའི་རྟེན་ཡང་ཡིན་གསུངས།
།ཇོ་བོའི་ཞལ་ནས། སོ་སོར་ཐར་པ་རིགས་བདུན་ལས། །རྟག་ཏུ་སྡོམ་གཞན་ལྡན་པ་ལ། །བྱང་ཆུབ་སེམས་དཔའི་སྡོམ་པ་ཡི།
།སྐལ་པ་ཡོད་ཀྱི་གཞན་དུ་མིན། །གསུངས་ལྟར་ཏེ། མི་མ་ཡིན་ལ་སོགས་པ་ལའང་སྣ་གཅིག་ལ་སོགས་ཀྱི་དགེ་བསྙེན་ཡོད་པས་འགལ་བ་ཚུལ་གསུངས།
།༈ རྡོ་རྗེའི་གསུང་༣པ། སོ་སོ་སྐྱེ་བོ་ལ་ཡང་འཇུག་པ་སྐྱེ་བ་ཡིན། བྱ་བ་ནི་དུས་རྒྱུན་དང་མཚུངས།
།འདིར་འདི་བྱུང་སྟེ། བྱང་ཆུབ་སེམས་དཔའི་སྤྱོད་པ་ཇི་སྙེད་པ་ཐམས་ཅད་བྱང་ཆུབ་སེམས་དཔའི་སྡེ་སྣོད་དུ་འདུས།
སྡེ་སྣོད་དེ་ཐམས་ཅད་འཕགས་པ་ཐོགས་མེད་ཀྱི་བྱང་སར་འདུས། བྱང་ས་ཙནྡྲ་གོ་མིའི་སྡོམ་པ་ཉི་ཤུ་པར་འདུས།
། གསུངས་པས་དཔེ་ཆ་ལྟ་ལྟངས་ལ་ཁྱད་འདུག་གོ །དུས་རྒྱུ་ང་ཚོས་བྱང་ཆུབ་སེམས་དཔའི་སྡེ་སྣོད་ནི་མདོ་ཕལ་ཆེན།
བྱང་ཆུབ་སེམས་དཔའི་སྡེ་སྣོད་ཀྱི་མ་མོ་ནི་བྱང་ས་ཞེས་བརྩི་སྲོལ་ཡོད། །
༈ ༡༦ ༡༢ ༡༢ དགོངས་གཅིག་བྱད་སེམས་གནད་བསྡུས་ཀྱི་འཚོམས་༢༤ལས་རྡོ་རྗེའི་གསུང་༤པ།
ཅི་རིགས་ཀྱིས་ཀྱང་ཚུལ་འཁྲིམས་བསྡོམ་པར་འགྱུར། བྱ་བ་ལ་ཞལ་སྔ་ནས། སྡོམ་པ་གསུམ་པོ་མཐའ་དག་རྫོགས་པར་བྱེད་པ་ནི་ས་བཅུའི་སེམས་དཔས་ཀྱང་མི་ནུས་པས་སངས་རྒྱས་ཉག་གཅིག་གིས་སྤྱོད་ཡུལ་ཡིན།
།ཞེས་གསུངས། །དེ་ལྟར་ན་དེ་བཞིན་གཤེགས་པའི་སྐུ་མཐོང་བ་ན་ཐལ་མོ་སྦྱོར་བ་ཙམ་དེ་ཡང་དགེ་བ་ཡིན་པས་དེ་དགེ་བ་ཆོས་བསྡུད་ཚུལ་འཁྲིམས།
དེ་ལས་གཞན་པའི་མི་དགེ་བ་བསྡམས་ནས་དེ་ཉིད་བརྩོན་པར་བྱེད་པ་བསྡོམ་པའི་ཚུལ་འཁྲིམས། དེ་བདག་གཞན་བྱང་ཆུབ་ཐོབ་པའི་ཕྱིར་དུ་ཡིན་པས་སེམས་ཅན་དོན་བྱེད་ཚུལ་འཁྲིམས་སུ་འོང་བས་དགེ་བའི་ཆོས་སྣ་རེ་ལའང་ཚུལ་འཁྲིམས་གསུམ་ཀ་ཚང་བས་སྣ་རེའམ་ཟུང་རེ་ཙམ་གྱིས་ཀྱང་འཇུག་སྡོམ་དུ་གྱུར་པས་བདག་ཅག་རྣམས་ཀྱིས་སྣ་རེའམ་ཟུང་རེ་ཙམ་དེ་ནི་སྲོག་ལ་བབས་ཀྱང་བསྲུང་བར་བྱ།
།དེའི་སྐབས་འཕགས་པ་ལམ་འབྱུང་གི་ལོ་རྒྱུས་གསུངས་ཏེ། ལམ་བྱུང་བྲམ་ཟེའི་རིགས་སུ་འཁྲུངས།
འོན་ཏེ་ཤེས་རབ་ཤིན་ཏུ་བརྟུལ་བས་བྲམ་ཟེའི་རིགས་སུ་འཁྲུངས་ཀྱང་བྲམ་ཟེ་བྱེད་པ་ལ་རིག་བྱེད་ཀྱི་སྔགས་འགའ་ཞིག་བློ་ལ་ཟིན་དགོས་ཀྱང་ཁོང་གིས་གཞན་ཕར་ཞོག་སྔགས་ཚིག་བཅད་གཉིས་ཀྱང་བློར་ཟིན་ན་གོང་མ་སྦྱོང་ཚེ་འོག་བརྗེད་འོག་མ་སྦྱོང་ཚེ་གོང་མ་བརྗེད་ནས་ཚིག་གཉིས་ཀྱང་ཟིན་མ་ཐུབ་ནས་བྲམ་ཟེའི་ནང་ནས་ཕྱིར་བསྐྲད་དོ།
།དེས་ནས་ཁོང་ཤིན་ཏུ་སྡུག་བསྔལ་ནས་ལམ་དུ་འཁྱམས་བཞིན་པའི་ཚེ་བཅོམ་ལྡན་འདས་མཇལ། དེ་ནས་བཅོམ་ལྡན་འདས་ཀྱིས་ཁྱོད་ངའི་རྗེས་སུ་འབྲང་ངམ་གསུངས་པས་ཁོ་ཤིན་ཏུ་དགའ་ནས་ཕྱིེས་བཞིན་འབྲངས་ཏེ་རྒྱལ་པོའི་ཁབ་མགོན་མེད་ཟས་བྱིན་གྱི་ཀུན་དགའ་ར་བར་ཕྱག་བརྡར་བསྐུལ་ཞིང་བསོད་སྙོམས་ལྷག་མ་གནང་བས་ཁོ་ཤིན་ཏུ་དགའ་ནས་ལས་ཚུལ་བཞིན་བྱེད་དེ་གནས་སྐབས་ནམ་ཞིག་གཅིག་ན་བཅོམ་ལྡན་འདས་ཀྱིས་ཁོའི་སྒྲིབ་པ་ཅུང་དག་པ་མཁྱེན་ནས་ལམ་བྱུང་ཁྱོད་ཕྱག་བབརྡར་བྱེད་བཞིན་ལ་རྡུལ་སྤངས་དྲི་མ་སྤངས་ཞེས་པའི་ཚིག་བཅད་གཅིག་པོ་དེ་སྦྱོང་ནུས་སམ་གསུངས་པས།
ནུས་ལགས་སོ་ཞུས་ནས་ཡང་དུས་རིང་པོར་ཕྱག་བརྡར་བྱེད་བཞིན་ལ་ཚིག་བཅད་དེ་སྐྱོར་སྦྱངས་བྱས།
།དེ་ནས་ཡང་བཅོམ་ལྡན་འདས་ཀྱིས་མཁྱེན་ནས་ལམ་བྱུང་ཞེས་འབོད་ནས། ཚིག་བཅད་བཞི་སྟེ། རྡུལ་ནི་ས་རྡུལ་མ་ཡིན་ཉོན་མོངས་རྡུལ།
།ས་རྡུལ་ཕྱགས་པས་ཉོན་མོངས་སྒྲིབ་དག་ཤོག །ཅེས་ཞེ་སྡང་དང་འདོད་ཆགས་དང་གཏི་མུག་ལ་སྦྱར་བའི་ཚིག་བཅད་སླབ་པས་སླར་ཡང་ཕྱག་བརྡར་བྱེད་བཞིན་ཡུན་རིང་སྐྱོར་སྦྱང་བྱས་།
།དེ་ནས་ནམ་ཞིག་ན་བཅོམ་ལྡན་འདས་ཀྱིས་འཕགས་པ་ལམ་བྱུང་སྒྲིབ་པ་དག་པ་མཁྱེན་ནས་ལོ་དེའི་དབྱར་གནས་ལ་དགེ་སློང་མའི་ཆོས་བཤད་ལ་འཕགས་པ་ལམ་བྱུང་གཏོང་གི་ཡིན་གསུངས་པས་ཡོངས་གྲགས་ལ་ཁོང་ཤེས་རབ་ཤིན་ཏུ་བརྟུལ་ཞིང་སྐྱེ་བོ་ཐ་ཆད་ཞིག་ཏུ་འཛིན་པས་དགེ་སློང་མ་འགའ་རེས་བཅོམ་ལྡན་འདས་ཀྱིས་དགེ་སློང་མ་ལ་མཐོང་ཆུང་གནང་སོང་ཞེས་ཡ་ག་སྒྲོགས་ཀྱང་འཕགས་པ་ལམ་བྱུང་གི་གོང་གི་ཤོལྐོ་གཅིག་པུ་དེ་ལ་ཟླ་བ་གསུམ་གྱི་རིང་ཆོས་གསུངས་པས་ཐམས་ཅད་ངོ་མཚར་ཆེར་སྐྱས་ནས་ཤིན་ཏུ་དད་པར་གྱུར་རོ།
།འོན་ཏེ་དགེ་བ་ལ་ཆོག་ཤེས་ནི་མི་འོས་པ་མཁན་པོས་གསུངས། །༈ རྡོ་རྗེའི་གསུང་༥པ། ཉོན་མོངས་ཅན་མ་ཡིན་པའི་ལྟུང་བ་མེད།
བྱ་བ་ནི་ཁ་ཅིག་དུག་གསུམ་གྱི་མ་བསླང་བར་ལེ་ལོ་སྙོམས་ལས་དྲན་པ་ཉམས་པ་བརྗེད་ངེས་གཉིད་ལ་སོགས་པས་དཀོན་མཆོག་མཆོད་པ་བཅག་པ་ལ་སོགས་ནི་ཉོན་མོངས་ཅན་མ་ཡིན་པའི་ལྟུང་བ་ཡིན་ཟེར་བ་ལ།
དེ་ནི་རྣམ་པ་ཐམས་ཅད་དུ་མེད་གསུངས། །མཁའགྲོ་བསྡོམ་པའི་རྒྱུད་ལས། མི་ཤེས་པ་དང་བག་མེད་དང་།
།མ་གུས་པ་དང་ཉོན་མོངས་པ། །བརྗེད་ངེས་དྲན་པ་མ་གསལ་བ། །འདི་དྲུག་དམ་ཚིག་ཉམས་པའི་རྒྱུ།
།ཞེས་གསུངས་པའི་མཚོན་ནོ། ། ༈ རྡོ་རྗེའི་གསུང་༦པ། ཉེས་པར་མི་འགྱུར་བའི་མི་དགེ་བ་དེ་གནང་བ་མེད།
བྱ་བ་ནི་ཤིན་ཏུ་ཟབ་སྟེ་འདིར་ཞལ་སྔ་ནས། རྒྱུ་འབྲས་རྟེན་འབྲེལ་འདིའི་གཤིས་དང་བབས་ཀྱིས་༼མི་ནག་མདུང་མཐུང་གྱི་ལོ་རྒྱུས་ལྟ་བུ་༽དེ་ལྟ་བུ་རྣམས་ཉེས་པར་མི་འགྱུར་བས་༼དེད་དཔོན་སྙིང་རྗེ་ཅན་ལ་ཉེས་པ་མི་འགྱུར་བའི་ཆ་ནས་༽གནང་བ་མ་ཡིན།
།༼འོན་ཏེ་དམྱལ་བའི་སྡུག་བསྔལ་བཟོད་པར་ནུས་པའི་ཆ་ནས་གནང་བ་ཡིན་ཏེ།༽བྱང་ཆུབ་སེམས་དཔའ་རྣམས་བདག་ཡལ་བར་དོར་ནས་གཞན་དོན་ལ་བརྩོན་པས་ལས་དེའི་འབྲས་བུ་ཉམས་པར་མི་ནུས་ཤིང་བཟོད་པར་ནུས་པའི་ངོས་ནས་གནང་ཞེས་གསུངས་པ་ཡིན།
།དེ་ལ་དཔེ་གཏམ་རྒྱུད་དང་སྦྱར་ན་གོ་སླ་སྟེ། དེད་དཔོན་སྙིང་རྗེ་ཆེན་པོས་ཚོང་དཔོན་ལྔ་བརྒྱས་སྲོག་སྐྱབ་དང་མི་ནག་མདུང་ཐུང་དམྱལ་བ་ལས་སྐྱབས་པས་བསྐལ་པ་དགུ་ཁྲིའི་ཚོགས་གདུམ་པ་དང་།
ལྡོག་ཆ་སྲོག་བཅད་པའི་ཉེས་པ་ནས་ལོ་སྟོང་ཕྲག་མང་པོར་སེམས་ཅན་དམྱལ་བའི་སྡུག་བསྔལ་མྱོང་ནས་སངས་རྒྱས་པའི་དུས་ནའང་ལས་ཀྱི་ལྷག་མས་ཞབས་ལ་སེང་ལྡེང་གི་འཚལ་བུ་ཟུག་པར་གསུངས་པས་འབྲས་བུ་འབྱུང་གསུངས་སོ།
།དེས་ན་ལས་དཀར་པོ་བཟང་ཡག་བྱུང་ན་རབ་དང་དེ་མིན་གཞན་དོན་ཆེད་དུ་མི་དགེ་སྤྱོད་དགོས་ན་ཡང་ལས་ཀྱི་འབྲས་བུ་མེད་པ་མ་ཡིན་ཞིང་ཡོད་ཀྱང་བཟོད་ཐུབ་པའི་དཔའ་གདེངས་དགོས་སོ།
།
༈ ༡༧ ༡༢ ༡༢ དགོངས་གཅིག་བྱད་སེམས་གནད་བསྡུས་ཀྱི་འཚོམས་༢༤ལས་རྡོ་རྗེའི་གསུང་༧པ།
ཐབས་མཁས་པ་ལ་མི་དགེ་བ་ཡོད་ན་དེའི་འབྲས་བུ་འབྱུང་། བྱ་བ་ཡང་གོང་གིས་ཟླས་དྲངས་སྙམ་སྟེ།
འདིར་ཞལ་སྔ་ནས། བྱང་ཆུབ་སེམས་དཔའི་ ཐབས་མཁས་པ་ལ་མི་དགེ་བ་ཡོད་མི་སྲིད། གལ་ཏེ་ཡོད་ན་དེའི་འབྲས་བུ་འབྱུང་གསུངས།
།སྐབས་འདིར་དེད་དཔོན་སྙིང་རྗེ་ཅན་ལ་ཞེ་སྡང་མེད་ན་མདུང་རྡེག་མི་ཕོད། དེས་ན་དུས་ཀྱི་ཀུན་སློང་ལ་ཞེ་སྡང་ཡོད་གསུངས།
།དེ་བཞིན་བྲམ་ཟེ་ཁྱེའུ་བླ་མས་ཤེས་རབ་ཀྱི་ཕ་རོལ་ཏུ་ཕྱིན་པའི་དོན་ལ་བསམས་ནས་དེ་བཞིན་གཤེགས་པ་འོད་སྲུང་ལ་དགེ་སྦྱོང་མགོ་རེག་ལ་བྱང་ཆུབ་ག་ལ་ཡོད་སྨྲས་པས་དེ་ལ་ཡང་འབྲས་བུ་༼ལོ་དྲུག་བཀའ་སྤྱད་༽བྱུང་གསུངས།
།༈ རྡོ་རྗེའི་གསུང་༨པ། རང་གཞན་བརྗེས་པས་ཉེས་པར་འགྱུར་བའི་སྐབས་ཡོད། བྱ་བ་ལག་ལེན་དངོས་ལ་གསུངས་པ་འདྲ་སྟེ་འདིར་ཞལ་སྔ་ནས།
ལམ་ཚོགས་སྦྱོར་གཉིས་ལ་བསམ་པ་རྒྱ་ཆེན་པོ་བསྐྱེད་ནས་སྦྱོར་བ་སེམས་ཅན་གྱི་དོན་འགྲུབ་༼སྒྲུབ་༽ཆེད་༼དགེ་བའི་བྱ་བ་༽ལྕོགས་ཚད་བྱས་ཀྱང་།
ལས་རྔམ་པོ་ཆེ་ལ་འཇུག་མི་ནུས་ཏེ་དཔེར་ན། མྱུ་གུ་ལ་མ་ཟོས་སྲུབས་༼འབྲུ་ཤུན་པ་མ་བཤུས་ནས་ལྗང་གུར་གནས་པའི་ཚེ་སུབས་ཞེས་བརྗོད་གསུངས་དེའི་ཐུག་པ་སུབས་ཐུག་ཅེས་པ་ཞིམ་མངར་འཛོམ་པའང་ཡོད་གསུངས་༽སུ་ཟོས་ན་༼ཕན་ཐོགས་༽འབྱུང་ཆེ་བ་དང་འདྲ་བས་ཕལ་ཆེར་རང་གཅེས་པའི་དུས་ཡིན།
མཐོང་ལམ་ནས་བཟུང་སྟེ་ས་བདུན་མན་ཆད་དུ་བསམ་སྦྱོར་གཉིས་ཀ་ནར་སོན་པས་སྤྱོད་པ་ལ་འཇུག་པ་ཡིན་ཀྱང་།
རྟུལ་ཞུགས་འབྲིང་ཡིན་པས་སྲུབས་སུ་མ་ཟོས་ནས་༼འབྲུ་༽སུ་ཟོས་ན་འབྱུང་ཆེ་བ་དང་འདྲ་བས་རང་གཞན་མཉམ་པའི་དུས་ཡིན།
ས་བརྒྱད་པ་ནས་བཟུང་སྟེ་ས་བཅུ་པ་ཚུན་ཆད་དུ་བསམ་སྦྱོར་གཉིས་ཀ་སྟོབས་ཆེ་བས་གཞན་དོན་རྒྱ་ཆེན་པོ་ཡང་འགྲུབ།
སྤྱོད་པ་རླབས་པོ་ཆེ་ལ་ཡང་འཇུག་ནུས། བརྟུལ་ཞུགས་ཀྱང་རབ་ཏུ་གྱུར། སྡུག་བསྔལ་བཟོད་པའི་སྟོབས་ཀྱང་བརྙེས།
གཏོང་བ་ཆེན་པོ་ལ་འཇུག་པའི་དུས་ཀྱང་ཡིན། སངས་རྒྱས་ཀྱི་ཞིང་བཀོད་པ་ཡང་སྒྲུབ་ནམཁའ་མཛོད་ཀྱི་ཏིང་ངེ་འཛིན་ཡང་ཐོབ་པས་ས་ཆོད་དེ་རང་བས་གཞན་གཅེས་པའི་དུས་ཡིན་ཏེ།
།ཞེས་གསུངས་པ་ལྟ་བུས་མཚོན་ནུས། །དེས་ན་གཏོང་ལེན་བསམ་པས་སྦྱང་བ་ལ་ཉེས་པ་མེད་པར་མངོན་སྙམ།
།འོན་ཀྱང་འོག་ཏུ་ཕག་གྲུའི་ལུང་ལ་བརྟེན་ནས་གཏོང་ལེན་བྱས་ནས་གཞན་གྱི་སྡུག་བསྔལ་རྣམ་པ་ཐམས་ཅད་རང་ལ་མ་སྨིན་པར་རང་སྡུག་ཁོ་ནར་ཟད་དགོངས་ན་བརྟག་དགོས་སོ།
།སྐབས་འདིའི་ལམ་དུ་གཏོང་ཚུལ་ནི་བསམ་པའི་སྦྱོང་སྐབས་གོ་སྐབས་བཟུང་ནས་བོགས་འདོན་དུ་བྱུང་བས་འགལ་བ་མེད་དོ།
།འོན་ཀྱང་གཏོང་ལེན་སྐབས་སྡུག་བསྔལ་ནད་དང་སེམས་གསོ་ཤི་ནས་སེམས་ཆུང་ནད་ལྟ་བུ་འགའ་ཞིག་ལ་བྱུང་བ་ནི་ཤེས་རབ་ཀྱི་ཐབས་མཁས་དང་བསོད་ནམས་ཀྱི་བསགས་རྒྱབ།
དགེ་བའི་བཤེས་གཉེན་གྱིས་མ་ཟིན་པའི་ལན་ཏེ་གསང་བའི་གདམ་པ་སྤྱད་པར་བྱ། །གསུངས་པ་ལྟར་ལམ་འདིའི་གནད་གསང་ཤེས་དགོས་སྙམ་སྟེ་སྔར་བཀའ་གདམས་བླ་མ་རྣམས་གསང་བར་ཉམས་བཞེས་གནང་གི་ཡོད་པ་ལོ་རྒྱུས་ལ་གནད་བཙལ་ན་ཤེས།
། ༈རྡོ་རྗེའི་གསུང་༩པ། བྱང་ཆུབ་སེམས་དཔའ་ལ་གནོད་པ་བྱས་པས་བདེ་བར་འབྲེལ་མི་སྲིད། བྱ་བ་ནི་བྱང་སེམས་ལ་ངན་འབྲེལ་བྱུང་བ་དེས་ནམ་ཞིག་ན་འགྱོད་པས་བཤགས་པ་བྱས་ཚོགས་རྒྱ་ཆེར་མ་བསགས་ན་བདེ་བར་འབྲེལ་མི་སྲིད་བྱ་བའི་དོན་དུ་འདུགོ
།འདི་གསུངས་པའི་དགོས་པ་ནི་དེ་ཚེ་དེའི་དུས་ལ་གང་ལ་གནོད་པ་བྱས་ཀྱང་བདེར་འབྲེལ་བ། །སོགས་ཀྱི་ལུང་མང་པོ་ཞིག་ལ་འཁྲུལ་གཞི་བྱས་ནས་བྱང་སེམས་དང་བཟང་འབྲེལ་ངན་འབྲེལ་གང་བྱས་ཀྱང་བདེ་བར་འབྲེལ་བའི་ལོག་རྟོགས་ཆེན་པོ་བྱུང་བ་འགག་པའི་ཆེད་དུ་འོ།
།
༈ ༡༨ ༡༢ ༡༢ དགོངས་གཅིག་བྱད་སེམས་གནད་བསྡུས་ཀྱི་འཚོམས་༢༤ལས་རྡོ་རྗེའི་གསུང་༡༠པ།
དགེ་མི་དགེ་འབྲས་བུ་ངེས་པར་སོ་སོར་འབྱུང་། བྱ་བ་ནི་༈ རྡོ་རྗེའི་གསུང་༡༡པ། ནག་ཆོས་བཞིས་ཚེ་རབས་གཞན་དུ་སེམས་བསྐྱེད་བརྗེད་སྲིད་པ་ལས་འཆོར་བ་ནམ་ཡང་མི་སྲིད་ཅེས་ཚོམ་པོ་ཆེ་དྲི་མ་མེད་པའི་ལོ་རྒྱུས་དང་བཅས་གསུངས།
།འོ་ན་སེམས་བསྐྱེད་ཕྱིན་ཆད་འཆོར་མི་སྲིད་སྙམ་ན། འཆོར་བའི་རྒྱུ་གཅིག་བུ་ནི་ལོག་ལྟ་ཡིན།
བྱང་ཆུབ་ཀྱི་སེམས་ནི་ཕ་ལམ་དང་འདྲ་སྟེ་ལོག་ལྟ་ལུག་རྭ་ཡིས་མ་གཏོགས་གཞན་གང་གིས་འཆོར་མི་སྲིད་པ་གསུངས་པས་དེ་ལ་འཇུག་ཏུ་ཡོད་པ་ནི་ཨེ་མ་ཤིན་ཏུ་བསྐལ་པ་བཟངས་སོ།
།དེའི་རྗེས་མི་འཆོར་བའི་རྒྱུ་མཚན་བཞི་གསུངས་པ་ཚིག་བསྡུ་ན། ༡དམིགས་པ་སངས་རྒྱས་ནི་བསམ་གྱིས་མི་ཁྱབ་པས་དགེ་རྩ་ཆུང་ངུ་ཡིན་ཡང་མཐར་ཕྱིན་པ་དང་།
༢བར་མ་དོར་ཆུད་ཟོས་མི་འགྱུར་པ་དང་། ༣སེམས་ཅན་ཐམས་ཅད་ཀྱི་རྒྱུད་བདེ་གཤེགས་སྙིང་པོ་གདོད་ནས་རྟག་པའི་ངོ་བོར་གནས་པ་དང་།
༤འཇུག་སྡོམ་གྱི་བསླབ་བྱ་ཕྲ་མོ་དགེ་བའི་ལས་ཅི་རིགས་ཀྱང་འཇུག་སྡོམ་དུ་གྱུར་པས་མཐར་བྱང་ཆུབ་ཏུ་གཞོལ་བའི་གནད་དེ་བཞི་པོས་བྱང་ཆུབ་ཀྱི་སེམས་འཆོར་མི་སྲིད་དོ།
།༈ རྡོ་རྗེའི་གསུང་༡༢པ། སྒྲིབ་པ་༼ལས་སྒྲིབ་ཉོན་སྒྲིབ་ཤེས་སྒྲིབ་༽གསུམ་ཉོན་མོངས་པའི་སྒྲིབ་པ།
བྱ་བ་ལ་རྩ་བ་ཉོན་མོངས་པ་ཆེས་རགས་སུ་སོང་ནས་སྒོ་གསུམ་གྱི་ཉེས་སྤྱོད་ཐོན་པ་ལས་ཀྱི་སྒྲིབ་པ།
ཉེས་སྤྱོད་མ་ཐོན་པ་ཉོན་མོངས་ཙམ་དུ་ལུས་པ་ཉོན་མོངས་པའི་སྒྲིབ་པ། ཉོན་མོངས་མེད་ཀྱང་དེའི་བག་ཆགས་ལྒོག་དྲི་ལྟ་བུ་ལུས་པ་ཤེས་བྱའི་སྒྲིབ་པ་ཡིན་པས་ཆོས་པ་རྣམས་ཀྱི་གང་ལ་འཐབ་དགོས་པའི་དགྲ་བོའི་འབེན་དངོས་སུ་ངོས་ཟིན་པའོ།
།༈ རྡོ་རྗེའི་གསུང་༡༣པ། ༼དོན་དམ་པའི་གནས་ལུགས་༽བདེན་པ་ནི་གྲུབ་མཐའ་ཇི་སྙེད་པས་སྒྲིབ།
བྱ་བ་ནི། མགོན་པོ་ཀླུ་ཡིས། ལྟ་བ་ཐམས་ཅད་སྤང་པའི་ཕྱིར། །གསུངས་པ་དང་། ས་སྐྱས། འཛིན་པ་བྱུང་ན་ལྟ་བ་མིན།
།གསུངས་པས་གནས་ལུགས་དོན་དམ་ཞིག་གྲུབ་མཐས་ཁས་བླང་དུ་གྱུར་ན་སྨྲ་བསམ་བརྗོད་མེད་དང་ཁས་ལེན་བྲལ་བ་ཞེས་སོགས་བརྗོད་དགོས་དོན་ག་ལ་ཡོད།
།དེ་ནི་ལྐུགས་པས་བུ་རོ་ལྟར་རང་ཉིད་ཀྱིས་མྱོང་བས་ངེས་དགོས་པ་ལས་གྲུབ་མཐར་ཞེན་བློ་བཤིག་དགོས་པར་སྣང་།
།ཏེ་ལོ་ང་ཡིས་ཅི་ཡང་བསྟན་དུ་མེད། །རང་གིས་རང་ལ་མཚོན་ནས་རྟོགས་པར་བྱོས། །ཞེས་པ་ལྟ་བུ་ལགས་སོ།
།ཡང་དེ་ལས་ལྡོག་ནས་གྲུབ་མཐས་རང་གི་ངོ་གདོང་གི་སྒྲོ་སྐུར་བཅད་པས་གནས་ལུགས་ལ་སྦྱོར་བ་ནི་ངེས་པར་བྱས་ཏེ།
གཞན་དུ་ན་གྲུབ་མཐའ་དགོས་མེད་སོགས་སུ་གྱུར་རོ། །
༈ ༡༩ ༡༢ ༡༢ དགོངས་གཅིག་བྱད་སེམས་གནད་བསྡུས་ཀྱི་འཚོམས་༢༤ལས་རྡོ་རྗེའི་གསུང་༡༤པ།
ཉན་ཐོས་ཀྱིས་ཀྱང་ཕྱོགས་གཅིག་བབས་ཀྱི་གནས་ལུགས་མཐོང་། བྱ་བ་ལ་ཇི་སྐད་དུ། ཉན་ཐོས་རྣམས་ཀྱི་ཆོས་དབྱིངས་དང་།
།ང་ཡི་ཆོས་དབྱིངས་མཚུངས་པར་གཅིག །ཉན་ཐོས་རྣམས་ཀྱི་རྣམ་གྲོལ་དང་། །ང་ཡི་རྣམ་པར་གྲོལ་བའང་གཅིག
།ཅེས་པས་གྲུབ་མཐར་བཟུང་བ་རྡུལ་ཕྲན་ཆ་མེད་དང་ཤེས་པ་སྐད་གཅིག་ཆ་མེད་བར་དུ་བཤིག་པ་གཅིག་ཅིང་དེ་ནས་དངོས་སྟོབས་ཀྱི་མྱོང་བས་ཆ་མེད་དེ་ཡང་བཤིག་ནས་བདེན་མེད་རྟོགས་པས་ཉོན་མོངས་སྤོང་དགོས་ཏེ་ཞི་སྒོར་གཉིས་པ་འོ།
།༈ རྡོ་རྗེའི་གསུང་༡༥པ། ས་དྲུག་པ་མན་ཆད་ཉན་རང་གྱི་མངོན་རྟོགས་དང་ཐུན་མོངས་ཡིན། བྱ་བ་ལ་བྱང་སེམས་ས་དྲུག་པ་མན་ཆད་མཉམ་བཞག་ལ་བདེན་མེད་རྟོགས་པ་ལ་གཅིག་པར་མ་ཟད་རྗེས་ཐོབ་ཏུ་ཡང་ས་ལྔ་པར་བདེན་བཞི་ཕྲ་རགས་ལ་མཁས་པ་བཞིན་ཉན་ཐོས་ཀྱང་མཚུངས་པས་གཅིག
།དྲུག་པར་རྟེན་འབྲེལ་ལུགས་འབྱུང་ལྡོག་ཕྲ་རགས་ལ་མཁས་པ་བཞིན་རང་རྒྱལ་ཀྱང་དེ་ལ་གཅིག་མཚུངས་སུ་མཁས་པར་གསུངས་པས།
མདོར་ན་ས་དྲུག་པ་མན་ཆད་ཀྱིས་ཉན་རང་རྟོགས་པས་གཟིལ་གྱིས་གནོན་མི་ནུས་པར་གསུངས་ཤིང་འོན་ཏེ་རིགས་ཀྱི་སྒོ་ནས་ནི་བྱང་སེམས་ཚོགས་སྦྱོར་རྣམས་ཀྱིས་ཉན་རང་གཟིལ་གྱིས་ནོན་པར་གསུངས་སོ།
།ལོ་རྒྱུས་ལ་བུ་མོ་མྱ་ངན་མེད་ཡོད། །དེས་འབྲེལ་ནས།༈ རྡོ་རྗེའི་གསུང་༡༦པ། སེམས་ཙམ་ནི་ས་བདུན་གྱི་མངོན་རྟོགས་རིང་དུ་སོང་།
བྱ་བ་ནི་མཉམ་བཞག་ལ་ནི་ག་ལ་ཡིན་ཏེ་ས་དང་པོ་ནས་བདེན་མེད་མངོན་སུམ་དུ་རྟོགས་ཟིན་པའི་ཕྱིར།
དེས་ན་རྗེས་ཐོབ་ཏུ་ཉན་རང་གིས་འཇུག་པར་དཀའ་བའི་མཉམ་བཞག་ལ་སྐད་ཅིག་གཅིག་ལའང་མཇུག་ལྡང་དུ་མ་བྱེད་ནུས་ཤིང་དངོས་པོ་གང་འདོད་སྒྱུར་ནུས་པའི་མཐུ་ཐོབ་པས་སེམས་ཅན་གྱི་དོན་ཐབས་མཁས་པའི་ཕ་རོལ་ཏུ་ཕྱིན་པ་ཐོབ་པའི་རྒྱུ་ཡི་གཙོ་བོ་ནི་ཆོས་ཀུན་སེམས་ཙམ་དུ་མངོན་སུམ་མྱོང་སྟོབས་ཀྱི་མངོན་རྟོགས་འཁྲུངས་པ་ལ་བརྟེན་ནས་བྱུང་བར་གསུངས་པས་ཉན་རང་གྱི་མངོན་རྟོགས་ལས་རིང་དུ་སོང་ཞེས་གསུངས།
།རྒྱབ་བརྟེན་ལུང་ནི་འགྲེལ་པར་གསལ། །དེས་དྲངས་ནས་༈ རྡོ་རྗེའི་གསུང་༡༧པ། ཆོས་བདག་མེད་པ་ས་བརྒྱད་པ་ལ་མངོན་དུ་བྱས། བྱ་བ་ལ་འགྲེལ་པ་བྱེད་མ་ནུས།
འོན་ཏེ་གོང་གི་བབ་ལས། སོ་སྐྱེས་ཚོགས་སྦྱོར་ལ་ཆ་མེད་ཀྱི་ལྟ་བ་མངོན་དུ་གྱུར། ས་དང་པོ་ནས་དྲུག་པའི་བར་གང་ཟག་གི་བདག་མེད།
བདུན་པ་ལ་ཕྱེད་བདག་མེད་སེམས་ཙམ། ས་བརྒྱད་པར་ཆོས་ཀྱི་བདག་མེད་དངོས་སྟོབས་ཉམས་མྱོང་གི་མངོན་སུམ་དུ་གྲུབ་པར་གསུངས་པ་འདྲ།
།དེ་ཐམས་ཅད་མཉམ་བཞག་ལ་མི་བརྩིས་རྗེས་ཐོབ་ལ་ད་ལྟ་ངེད་རང་ཚོ་ལ་གང་སྣང་བདེན་པ་ཨ་ཐས་མངོན་སུམ་དངོས་སྟོབས་ཉམས་མྱོང་གི་ཚུལ་དུ་སྣང་བ་བཞིན་བཞག་དགོས་པ་འདྲ་སྟེ་བསམ་ཚུལ་ཙམ་མོ།
།ལུང་སོགས་ཀྱི་དགོངས་འགྲེལ་འགྲེལ་པར་གཟིགས། །
༈ ༢༠ ༡༢ ༡༢ དགོངས་གཅིག་བྱད་སེམས་གནད་བསྡུས་ཀྱི་འཚོམས་༢༤ལས་རྡོ་རྗེའི་གསུང་༡༨པ།
ས་ལམ་ཐམས་ཅད་རྟོགས་པ་གཅིག་གིས་འགྲོད། བྱ་བའི་དོན་ནི། ཐེག་པ་ཐུན་མོང་གི་སྟོང་ཉིད་དང་།
ཐུན་མིན་གྱི་ལྷན་སྐྱེས་ཡེ་ཤེས་ལ། གསལ་སྣང་ཅུང་ཟད་ཐོན་ནས་གོང་འཕེལ་འགྱུར་བ་ལ་ཚོགས་སྦྱོར་ཏེ་རྩེ་གཅིག
།དེའི་ངོ་བོ་མངོན་སུམ་དུ་མཐོང་བ་ན་མཐོང་ལམ་སྟེ་སྤྲོས་བྲལ། །ལུས་དང་སྣང་བ་ཐམས་ཅད་དེ་འདོར་ན་ཕྱི་རོལ་གྱི་འཁོར་བའི་སྣང་བའང་ཆོས་ཉིད་དེ་ཉིད་དུ་ནུབ་འགོ་ཚུགས་པ་དག་ས་སྟེ་རོ་གཅིག
།མཉམ་རྗེས་དང་ཡུལ་ཡུལ་ཅན་གཉིས་མེད་དུ་རྟོགས་འདྲེས་གྱུར་ནས་མཉམ་བཞག་ངང་དེ་ག་ནས་འགྲོ་དོན་ལྷུན་གྲུབ་ནི་སངས་རྒྱས་ས་སྟེ་བསྒོམ་མེད།
།དེས་ན་འཇིག་རྟེན་མགོན་པོས། ཅི་ལྟར་སྨྱུག་ཚིགས་མང་པོ་ལ། །བཀས་པའི་ཚུལ་གྱིས་ཐམས་ཅད་ཀྱང་།
།གས་པ་གཅིག་གིས་བཀས་པ་ལྟར། །དེ་བཞིན་ཡེ་ཤེས་གཅིག་ནས་གཅིག །ཅེས་པ་ལྟར་རྟོགས་བྱ་ཆོས་ཉིད་གཅིག་གསལ་ཟབ་རིམ་གྱིས་མཐར་ཕྱིན་པའི་ཚུལ་དུ་གྱུར་པའོ།
།༈ རྡོ་རྗེའི་གསུང་༡༩པ། ས་ཡི་ཡོན་ཏན་བྱུང་བ་མུ་དྲུག བྱ་བ་ནི། ས་ཐོབ་ནས་ས་དེའི་ཡོན་ཏན་ཇི་ལྟར་འབྱུང་བ་ལ།
༡རིམ་གྱིས་པའི་མུ། ༢ཅིག་ཆར་བའི་མུ། ༣འགའ་ཞིག་ཡོད་པ་དང་མེད་པའི་མུ། ༤ཡོད་ཀྱང་གཞན་གྱིས་མི་མཐོང་བའི་མུ།
༥རྣལ་འབྱོར་ཉམས་སྣང་གི་མུ། ༦ལུང་ཁུངས་ཀྱི་མུ་བཅས་ཀྱི་མུ་དྲུག་འགྲེལ་པ་དང་ལོ་རྒྱུས་ནི་འགྲེལ་པར་གསལ།
།དོན་མདོར་ན་ས་ཐོབ་པ་དང་དེའི་ཡོན་ཏན་རྣམས་ཉི་མ་དང་འོད་ཟེར་བཞིན་སྐད་ཅིག་ལ་འབྱུང་མི་དགོས་པར་དོད་ཡོན་ཏན་རྣམས་སྦྱང་པའི་སྟོབས་ཀྱིས་འབྱུང་གསུངས།
།དཔེར་ན་རྗེ་མི་ལ་ལྟ་བུ་བླ་མ་མར་པའི་དྲུང་དུ་ལོ་དྲུག་དང་ཕྱེད་ཀས་ས་དང་པོ་མཐོང་ལམ་ཐོབ་དེ་ནས་ཕ་ཡུལ་དུ་མི་རྟག་བསྐུལ་མས་བྲག་དཀར་རྟ་སོ་སོགས་སྒྲུབ་པའི་ཡོན་ཏན་རྣམས་སྦྱངས་པས་དོད་ཡོགས་གྲགས་གནམ་ལ་འཕུར་བ་དང་མངོན་ཤེས་སོགས་ས་དང་པོའི་ཡོན་ཏན་ཐོབ་གསུངས།
།༈ རྡོ་རྗེའི་གསུང་༢༠པ། རྒྱུ་ལམ་འབྲས་བུ་ཐམས་ཅད་ཚོགས་གཉིས་ཟུང་འཇུག བྱ་བ་ནི། འཆད་ཚེ་བསོད་ནམས་དང་ཡེ་ཤེས་ཀྱི་ཚོགས་ཞེས་ཐ་དད་དུ་འཇོག་རྒྱུ་ཡོད་ཀྱང་ཉམས་སུ་ལེན་ཚེ་རྣམ་པ་ཐམས་ཅད་དུ་ཚོགས་གཉིས་ཟུང་དུ་འཇུག་པའམ་ཟུང་དུ་འབྲེལ་དགོས་གསུངས།
།༈ རྡོ་རྗེའི་གསུང་༢༡པ། མཐོ་དམན་གང་དུ་ཡང་ཞིང་གདམ་པ་གནད། བྱ་བ་ལ་ཞལ་སྔ་ནས། རྒྱུད་ཚོད་མཐོ་དམན་གང་ཡིན་ཀྱང་ཞིང་གདམ་དགོས་ཏེ།
༡བསོད་ནམས་ཀྱི་ཚོགས་ཅུང་ཟད་གཅིག་བསགས་ཀྱང་གནས་སྐབས་དང་མཐར་ཐུག་ཏུ་འབྲས་བུ་རྒྱ་ཆེན་པོ་བྱུང་བ་དང་།
༢དགེ་བའི་རྩ་བ་དེ་རང་གཞན་གྱི་དོན་དུ་བསྔོས་པས་རང་གཞན་གྱི་དོན་རྒྱ་ཆེན་པོ་འབྱུང་བ་དང་།
༣ཡུལ་དམན་པ་གསུམ་ལ་སྦྱིན་ན་འབྲས་བུ་ཆུང་ངུ་ལས་མི་འབྱུང་བའི་སྟེང་དུ་ཉེས་པ་གསུམ་འབྱུང་བ་དང་༼བཅས་༽རྒྱུ་མཚན་གསུམ་གྱིས་མཐོ་དམན་གང་དུ་ཡང་ཞིང་གདམ་དགོས།
།གསུངས། །ཞིང་དམན་པ་གསུམ་དང་དེའི་ཉེས་པ་གསུམ་འགྲེལ་པར་གསལ། །འོན་ཏེ་ཞིང་དམན་པ་བྱུང་ན་ཞིང་དམ་པར་སྒྲུབ་དགོས་པར་གསུངས་ཏེ།
ཆོས་ཐམས་ཅད་རང་གི་སེམས། སེམས་གར་ཡང་བསྒྱུར་བཏུབ་པས་ཞིང་སངས་རྒྱས་སོགས་སུ་དམ་པར་བསྒྲུབས་ནས་འབུལ་དགོས།
།དེ་ལྟ་མ་ཡིན་པར་ཞིང་དམ་པ་སངས་རྒྱས་ཀྱང་རང་སེམས་མ་དག་པས་ཞིང་དམན་པར་བསྒྲུབ་ཏུ་ཡོད་པས་གཟབ་འཚལ་གསུངས་སོ།
།ཕག་གྲུས། བྱམས་པ་སྒོམ་པའི་སྒོམ་ཆེན་དེས། །་དགྲ་གཉེན་ཐམས་ཅད་ཕ་མར་མཐོང་། །བསྐྱེད་རིམ་བརྟན་པའི་སྒོམ་ཆེན་གྱིས།
།སྣོད་བཅུད་ཐམས་ཅད་ལྷ་རུ་མཐོང་། །འོད་གསལ་སྒོམ་པའི་སྒོམ་ཆེན་གྱིས། །ཕྱོགས་རིས་མེད་པ་ཆོས་སྐུར་རྟོགས།
།ཞེས་གསུངསོ། །
༈ ༢༡ ༡༢ ༡༢ དགོངས་གཅིག་བྱད་སེམས་གནད་བསྡུས་ཀྱི་འཚོམས་༢༤ལས་རྡོ་རྗེའི་གསུང་༢༢པ།
ཆེད་དུ་བདག་ཏུ་བཟུང་ནས་ཚོགས་གསོག་པ་ཐབས་མཁས། བྱ་བ་ནི་སྤྱོད་འཇུག་ལས། འདི་ལ་བདག་གི་ཞེན་བྱ་བཞིན།
།ཞེས་སོགས་གསུངས་པ་ལྟར་དང། འདིར་ཞལ་སྔ་ནས། འདི་མེད་ན་སྐྱོན་དང་ཡོན་ཏན་བགག་སྒྲུབ་ཆོས་གང་ཡང་མ་བཟུང་བའི་བློ་ཆོལ་ལེ་༼ཉོག་ལེ་༽དེ་ནི་གཏི་མུག་ཡིན་པས་སླར་ཡང་བདག་འཛིན་མཁྲེག་པར་གྱུར་ནས་སྤོང་དཀའ།
བདག་མེད་ཀྱི་དོན་རྟོགས་པ་ལྟ་ཅི་དགོས་པ་ལས་སླ་བ་ཡང་མི་གྲུབ་པས། ཆེད་དུ་བདག་ཏུ་བཟུང་བ་འདི་ཟབ་གསུངས།
།དེས་ནས་དངོས་པོ་རྣམས་བདག་ཏུ་བཟུང་ནས་ཡུལ་གོང་མ་དང་དོན་རྒྱ་ཆེན་པོ་ལ་མཆོད་པ་ནི་ཐབས་མཁས་ཏེ།
དེ་ཉིད་ལས། ཡོངས་སུ་བཟུང་བ་མེད་པ་དེ་དག་ཀུན། །བློ་ཡིས་བླངས་ནས་ཐུབ་པ་སྐྱེས་ཀྱི་མཆོག
།ཅེས་སོགས་བྱུང་བའི་ཕྱིར་སོ། །༈ རྡོ་རྗེའི་གསུང་༢༣པ། འཁོར་འདས་ཐམས་ཅད་ཀྱི་དགེ་བའི་རྩ་བ་བསྔོ་བ།
བྱ་བ་ནི་གོང་ལས་འཕྲོས་ཏེ་ཐབས་མཁས་པས་འཁོར་འདས་ཐམས་ཅད་ཀྱི་དགེ་བའི་རྩ་བ་བསྔོ་བ་ལ་ཐོབ་ཐང་ཡོད་པར་གསུངས་ཏེ།
བདག་དང་འཁོར་འདས་ཐམས་ཅད་༡རང་སེམས་ཡིན་པས་གང་བསྒྱུར་བསྒྱུར་དུ་ཡོད་པའི་ཕྱིར་དང་། ༢ཆོས་དབྱིངས་ལ་ཁྱད་པར་མེད་པའི་ཕྱིར་དང་།
༣མ་རྒན་གྱི་དོན་དུ་སེམས་བསྐྱེད་པས་མ་ཡི་བུ་རང་ཉིད་ཡིན་པས་མ་རྒན་སེམས་ཅན་ཐམས་ཅད་ཀྱི་དགེ་རྩ་རང་ལ་དབང་བ་དང་།
༤སངས་རྒྱས་རྣམས་ཀྱིས་དང་པོ་ཐུགས་བསྐྱེད་བར་དུ་ཚོགས་བསགས་ཐ་མར་སངས་རྒྱས་ནས་ཆོས་བསྟན་པའི་དགེ་རྩ་ཇི་སྙེད་པ་ཐམས་ཅད་སེམས་ཅན་གྱི་དོན་དུ་བས་ན་ངེད་རང་རྣམས་ཀྱི་དགེ་རྩ་དེ་ཐམས་ཅད་བསྟན་པ་དང་སེམས་ཅན་གྱི་དོན་བསྔོ་ཆོག་གསུངས།
།མདོར་ན་བསྔོ་བ་གལ་ཆེ། །༈ རྡོ་རྗེའི་གསུང་༢༤པ། ༼མ་ཟད་༽སངས་རྒྱས་བླ་མ་ལ་ཡང་བསྔོ་བ་དགོས།
བྱ་བ་ནི་ཞལ་སྔ་ལས། ༼སངས་རྒྱས་དང་བླ་མའི་༽འཕྲིན་ལས་རྫོགས་པ་ལ་མྱུར་བས་སངས་རྒྱས་དང་བླ་མ་ལ་ཡང་བསྔོ་བ་བྱས་ན་ལྷག་པར་དགའ་གསུངསོ།།
།།བསྐལ་པ་དུ་མ་རབ་དགོངས་མཛད་པ་ཡི། །ཐུབ་དབང་རྣམས་ཀྱི་དེ་ཉིད་ཕན་པར་གཟིགས། །བཞི་པ་བྱང་སེམས་གནད་བསྡུས་ཀྱི་ཚོམས་ཀྱི་ཟིན་བྲིས་ཐལ་ལོ།།
།།
No comments:
Post a Comment