28-5/1/13.དགོངས་གཅིག་ཟིན་བྲིས། gongchig note घोड चीग चारचा

དཔལ་ཕག་མོ་གྲུབ་པ་ལ་ན་མོ།

༢༨ ༡༢ ༡༢༈ དགོངས་གཅིག་ལྟ་སྒོམ་སྤྱོད་པའི་གནད་བསྡུས་ཀྱི་འཚོམས་༢༠ལས་རྡོ་རྗེའི་གསུང་༡པོ། བརྒྱུད་པ་བརྒྱུད་པའི་ཆོས་ཟབ་ཅིང་ངོ་མཚར་བ་ཡིན། བྱ་བ་ལ་བརྒྱུད་པ་དེ་ཡང་འདིར་ཞལ་སྔ་ནས། ཡང་དག་པར་རྫོགས་པའི་སངས་རྒྱས་ནས་རང་གི་རྩ་བའི་བླ་མའི་བར་དུ། ཞལ་ནས་ཞལ་དུ་བརྒྱུད་པས་བརྗོད་བྱེད་ཀྱི་ཚིག་ཟུར་མ་ཉམས་པ། སྙན་ནས་སྙན་དུ་བརྒྱུད་པས་རང་བཟོ་དང་སྙན་མངགས་སུ་མ་སོང་བ། ཐུགས་ནས་ཐུགས་སུ་བརྒྱུད་པས་བརྗོད་བྱའི་དོན་བྱིན་རླབས་ཀྱི་བརྒྱུད་པ་མ་ཆད་པ་ཡིན་ཏེ། འདྲེས་འཁྱེར་དང་དམ་ཉམས་ཀྱི་བརྒྱུད་པར་མ་སོང་ཞིང་། སྒྲུབ་བརྒྱུད་ཀྱི་བཀའ་མ་ཞིག་ལ་ཚོང་དུས་ཀྱི་འོ་མ་ལྟར་མ་སོང་སྟེ། མི་བར་ཁྱིས་མ་ཆོད་པ་དེ་ལྟ་བུ་ལས་བྱུང་བའི་ཆོས་ཟབ་ཅིང་ངོ་མཚར་བ་ཡིན། གསུངས། །དེ་ཡང་རྗེ་སྒམ་པོ་པ་ལ་སྟོན་པ་རྫོགས་པའི་སངས་རྒྱས་ནས་ཇོ་བོ་རྗེ་ཡབ་སྲས་བརྒྱུད་བཀའ་གདམས་དང་། རྡོ་རྗེ་འཆང་ནས་མར་མི་ལས་ཕྱག་ཆེན་ཆོས་དྲུག་ཏེ་བཀའ་ཕྱག་ཆུ་བོ་གཅིག་འདྲེས་སུ་གྱུར་པ་ངོ་མཚར་བའི་བརྒྱུད་པ་དེ་ལྟ་བུ་མ་ཡིན་པར་ས་ཆོས་ཤིང་ཆོས་གནམ་ཆོས་རྡོལ་ཆོས་སོགས་ལ་བརྟེན་པ་མ་ཡིན་ནོ། །

༢༩ ༡༢ ༡༢ ༈རྡོ་རྗེའི་གསུང་༢པ། འཁོར་འདས་ཀྱི་བསྡུས་པའི་ཆོས་ཐམས་ཅད་སེམས་ཡིན། །བྱ་བ་འདིར་ལང་གཤེགས་ལས། རྣམ་རྟོག་བག་ཆགས་འཁྲུལ་པ་ལ། །མི་རྣམས་ལ་ནི་ཕྱི་རོལ་སྣང་། །ཕྱི་རོལ་སྣང་བ་ཡོད་མེད་དེ། །སེམས་ནི་ཕྱི་རོལ་ཉིད་དུ་སྣང་། །ཞེས་གསུངས་པ་ལྟར་སེམས་ཙམ་པ་ཤུགས་ཆེར་སྟོན་ཡང་སེམས་ཙམ་ནི་སེམས་བདེན་གྲུབ་ཏུ་འདོད་པས་རྟག་མཐའ་དང་། ཕྱི་དོན་མི་བཞེས་པས་ཆད་མཐའ་ཡོད་པས་འདིར་ནི་སེམས་བདེན་མེད་དུ་འདོད་ཀྱང་ཕྱི་དོན་བདེན་མེད་དུ་མཚུངས་ཀྱང་ཡོད་མེད་ལ་ལུགས་གཞན་དང་ཁྱད་པར་ཕྱེད་ན་བསམ། །སེམས་ཙམ་འདི་ལ་དོན་གནད་ཆེན་པོ་ཡོད་དེ་རང་རེ་ལ་སེམས་བདེན་མེད་དུ་སྒྲུབ་པའི་དཀའ་ངལ་ལས་སྣང་བ་སེམས་སུ་སྒྲུབ་རྒྱུ་དེ་དཀའ་ངལ་ཆེ་བས། སྣང་བ་སེམས་སུ་སྒྲུབ་པ་ལ་སེམས་ཙམ་གྲུབ་མཐའ་དེ་ཆེས་ཕུལ་དུ་གྱུར་པའོ། །འོན་ཀྱང་དབུ་མ་པས། སྣང་བ་སེམས་སུ་འདོད་པ་ནི་སེམས་ཙམ་དང་མི་འདྲ་བར་སེམས་ཀྱིས་བཏགས་པ་ཙམ་ལ་འདོད་པ་ལས་སེམས་ཉིད་སྣང་བར་འཆར་བ་མི་འདོད་དེ་འདོད་ན་བེམ་ཤེས་གཉིས་གཅིག་ཏུ་སོང་ལ་དེས་ན། མཐོང་ཚད་སེམས་སུ་སྨྲ་བའི་ཕྱག་ཆེན་པ། །སེམས་ཡང་བེམ་པོར་ཐལ་བའི་འགལ་དུམ་ཕྲེང་། །གསུངས་པ་ལྟར་གྱི་སྐྱོན་འཇུག་སྙམ། །

༣༠ ༡༢ ༡༢འོ་ན་དེ་ལྟར་ཡིན་ན་སེམས་ཀྱི་གང་བཏགས་བཏགས་ཡིན་པར་གྱུར་པས་རང་གིབདེ་སྡུག་གང་མྱོང་གཞན་གྱིས་མྱོང་ལ་གཞན་གྱི་གང་མྱོང་རང་གིས་མྱོང་ཟེར་ན། དེ་ལྟ་བུ་བསྣོལ་བར་མི་མྱོང་སྟེ། སྣང་བ་རང་སེམས་རྒྱུ་འབྲས་ཡིན་པས་དེའི་རྒྱུ་མཚན་བླ་མའི་ཞལ་ལས་ཤེས་པ་ནི། སེམས་རང་འོད་སྣང་བར་སྣང་བ། སེམས་རང་གཟུགས་ལུས་སུ་སྣང་བ། སེམས་རང་སེམས་སུ་སྣང་བ་དང་གསུམ། །༼པོ་ནི་༽སེམས་ཀྱི་ངོ་བོ། སེམས་ཀྱི་རང་བཞིན། སེམས་ཀྱི་བྱེད་ལས་སོ། །དེ་རྣམས་གལ་ཆེན་པོ་ཡིན་གསུངས། །༈རྡོ་རྗེའི་གསུང་༣པ། ཆོས་ཐམས་ཅད་བསམ་པ་སྐད་ཅིག་མའི་རང་གཟུགས། བྱ་བ་ལ་གསུམགོན་པས། རྗེ་ཕག་མོ་གྲུབ་པའི་སྣང་བ་རང་སེམས་ཀྱི་ཁྲོད་ནས་འམ་བུ༼་ང༽ས་བསམ་པའི་རང་གཟུགས་འདི་བརྙེས་པ་ཡིན་གསུངས། དེ་ལ་སྤྱིར་ཆོས་ཉིད་མི་བསམ་པའི་རང་གཟུགས་དང་ཆོས་ཅན་བསམ་པའི་རང་གཟུགས་གཉིས་ཡིན་ལ། སྔ་མ་ནི་ཕྱག་རྒྱ་ཆེན་པོ་ཡིན། ཕྱི་མ་ལ་གསུམ་སྟེ། ད་ལྟ་བ་ བསམ་པ་སྐད་ཅིག་མའི་རང་གཟུགས། ཚེ་འཕོས་པ་བ བསམ་པ་སྐད་ཅིག་མའི་རང་གཟུགས། ཚེ་མ་འཕོས་ཀྱང་ལུས་འགྱུར་བའི་བསམ་པ་སྐད་ཅིག་མའི་རང་གཟུགས། །དང་པོའི་དཔེ་ནང་དུ་ཞེ་སྡང་སྐྱེས་པའི་སྣང་བ་་ཐམས་ཅད་དམར་ལིང་གི་འགྲོ་བ་ལྟ་བུ། གཉིས་པའི་དཔེ་ཆོས་རྒྱལ་མྱང་ངན་མེད་སྔར་སྟོན་པ་མཇལ་ཞིང་བྱེ་མ་སྦར་བ་གང་ཕུལ་ཚེ་འདི་ལ་དགྲ་བཅོམ་པ་གྲགས་པ་མཇལ་ཞིང་མཆོད་རྟེན་བྱེ་བ་བཞེངས་པ་ལ་སོགས་བསོད་ནམས་དཔག་མེད་པ་ཞིག་ཡིན་ཀྱང་འཆི་ཁར་གཡོག་མོའི་རླུང་གཡབ་རང་གི་སྟེང་དུ་ལྷུང་བར་ཞེ་སྡང་དྲག་པོས་གསོས་བཏབ་པས་ཕྱི་མ་དེ་མ་ཐག་པར་སྦྲུལ་གདུག་པར་སྐྱེ་བ་སླར་ཡང་རང་གི་བཀྲེས་པ་སེལ་ཕྱིར་སྲོག་ཆགས་གཞན་ལ་གནོད་པར་བརྩམ་པ་ན་རང་གི་བཤེས་གཉེན་དགྲ་བཅོམ་གྲགས་པས་རྒྱལ་པོ་གང་དུ་སྐྱེས་པར་བརྟགས་དུས་སྦྲུལ་དེར་སྐྱེས་པར་མཁྱེན་ནས་རྒྱལ་པོ་ཁྱོད་སྔར་ཞེ་སྡང་གིས་འདིར་སྐྱེས་ད་དུང་སེམས་ཅན་ལ་གནོད་དམ་གསུངས་ནས་བཀའ་བཀྱོན་པས་སྦྲུལ་དེ་ནོངས་ནས་ཟས་མ་བཟོས་པར་ལུས་དེ་ཉིད་དུ་སྲོག་བཏང་ནས་ལྷ་ཡུལ་དུ་སྐྱེས་པར་གསུངས། །གསུམ་པའི་དཔེ་ནི། དགེ་ཚུལ་ཞིག་རང་གི་མཁན་པོའི་ཆོས་གོས་ལ་འཇུས་ནས་ཀླུ་ཡུལ་དུ་ཕྱིན་ནས་ཀླུ་རྣམས་ཀྱིས་བསོད་སྙོམས་ཕུལ་རྗེས་དགེ་ཚུལ་དེས་ལྷུང་བཟེད་དཀྲུ་ཤལ་སྐབས་མཁན་པོས་ལྷུང་བཟེད་ནང་གི་ལྷག་མ་ཅུང་ཞིག་རང་གི་ལྕེ་ལ་རེག་པས་བདུད་རྩིའི་དྲོ་བ་བསམ་གྱིས་མི་ཁྱབ་པ་མྱོང་བས་ཁོ་ཀླུ་རྣམས་ལ་ཆེར་ཁྲོས་ནས་སྐད་ཅིག་དེ་ཉིད་དུ་ཞེ་སྡང་གི་རང་གཟུགས་ལུས་ཀླུར་གྱུར་མཁན་པོས་ཀྱང་ཟློག་པར་མ་གྱུར་པས་ཕྱིས་ཀླུ་རྣམས་ལ་གནོད་པའི་ཀླུ་གདུག་པ་ཅན་གྱུར་གསུངས། །དེས་ན་ཐམས་ཅད་བསམ་པ་སྐད་ཅིག་མའི་རང་གཟུགས་ལས་གྲུབ་པར་གསུངས་སྟེ། སེམས་དང་། ལས་དང་། འབྲས་བུ་གསུམ་གྱི་བསྡུས་པས། གསུམ་ཚོགས་ཀྱི་རྟེན་འབྲེལ་ལས་བྱུང་བར་དྲན་པ་ཉེར་བཞག་ལས་གསུངས་གསུངས། །༈རྡོ་རྗེའི་གསུང་༤པ། གཤིས་ལ་མི་གནས་ན་བལྟས་པས་མི་འགྱུར། བྱ་བ་ནི་གཞུང་གཞན་ནས་བློས་མ་བཏགས་པའི་དངོས་པོ་མེད་ཀྱང་བློས་གང་བཏགས་བཏགས་ཡོད་མ་དགོས་གསུངས་པ་ལྟར་འདིར་ཞལ་སྔ་ནས། དེ་ཡང་ཐམས་ཅད་མཁྱེན་པའི་གནས་དང་གནས་མ་ཡིན་པ་མཁྱེན་པའི་གནད་དང་། རྟེན་འབྲེལ་རྒྱུ་འབྲས་ཤེས་བྱའི་གཤིས་དང་འགལ་བ་དང་། དཔལ་ཆོས་ཀྱི་གྲགས་པའི་ཚད་མས་ཀྱང་འདི་མི་འགྲུབ་པ་དང་། རང་བློ་འཁྲུལ་བ་ལ་ཚད་མར་བྱས་པ་ལོག་ཤེས་ཡིན་པ་དང་། རྒྱུ་མཚན་རྣམ་པ་བཞིའི་སྒོ་ནས་གཤིས་ལ་མི་གནས་ན་བལྟས་པས་མི་འགྱུར་གསུངས། །ཡང་དོགས་པ་ལ་བསམ་གྱིས་མི་ཁྱབ་པའི་སྐད་ཅིག་སྐལ་པ་སོགས་ཀྱང་གཤིས་ལ་ཡོད་པ་ཡིན་ཏེ། འབྲི་གུང་གླིང་པས། དེ་ནི་སྐད་ཅིང་བསྐལ་པ་རྒྱ་མཚོར་སྟོན། །ཞིང་ཁམས་མཐའ་ཡས་ཕྲ་བའི་རྡུལ་དུ་འཛུད། །མི་མཚུངས་མཛད་པ་དཔག་མེད་སྟོན་གྱུར་ཀྱང་། །དེ་དག་མི་འཁྲུགས་གཤིས་ལ་གནས་པ་ལགས། །ཞེས་གསུངས་པ་ལྟར་རོ། །དེའི་སྐབས་ལ་ཐུགས་སྣང་ཡོད་ན་འཁོར་ལོ་ཐ་མའི་བསྟན་དོན་བདེ་གཤེགས་སྙིང་པོ་དང་དེ་ལས་ཕྲོས་ནས་སྔགས་བླ་མེད་ལ་ཐོས་བསམ་གནང་ན་རྔོ་ཐོགས་ཤོས་ཡིན་ནོ། །

༣༡ ༡༢ ༡༢ ༈རྡོ་རྗེའི་གསུང་༥པ། མཚན་ཉིད་དང་མི་ལྡན་པའི་བླ་མས་ཡོན་ཏན་བསྐྱེད་པར་མི་ནུས། བྱ་བ་ནི་ཞལ་སྔ་ལས། རང་མ་སྨིན་པར་གཞན་སྨིན་ནུས་པ་ནི་མི་སྲིད་དེ། གཤིས་ལ་མི་གནས་ན་བལྟས་པས་མི་འགྱུར་བྱ་བ་འདིའི་གནད་ཀྱིས་དེ་ལྟར་འོང་། དེས་ན་བླ་མའི་མཚན་ཉིད། བཤེས་གཉེན་དུལ་བ་སོགས་གསུངས། མདོ་ཧྲིལ་གྱིས་དྲིལ་ན། ལུས་ངག་ཡིད་གསུམ་ཆོས་དང་མཐུན་པ། བྱམས་དང་སྙིང་རྗེ་བསམ་པ་བརྟན། །སྐྱེ་མེད་སྤྲོས་བྲལ་ངེས་ཤེས་ཆེ། །ཞེས་རབ་གསུམ་ལྡན་གསུང་། །འོན་ཏེ་རྒྱུ་ཞུགས་པ་ཀུན་དགའ་བོས་ཆོས་ཤེས་པས་དགྲ་བཅོམ་མང་པོ་བྱུང་བ་དང་། ཁྱིའི་སོ་ལས་རྒན་མོར་བྱིན་རླབས་ཐོབ་པ་ནི། ཀུན་དགའ་བོ་དང་ཁྱི་སོས་ནི་མ་ཡིན་སངས་རྒྱས་བཅོམ་ལྡན་ཉིད་ལ་དམིགས་ནས་ཡིན་པས་མ་འཆོལ་བར་བྱ། །འོེན་ཏེ་འཇིག་རྟེན་མགོན་པོས། བླ་མ་ངན་ལ་མོས་གུས་བྱས་པས་གྲིབ་ཡོང་ཟེར་བའི་རྗེས་སུ་མི་འབྲང་། མཆོད་པ་བྱས་པས་གནོད་ཡོང་ཟེར་བའི་རྗེས་སུ་མི་འབྲང་། ངན་པ་ལ་བཟང་པོར་བལྟས་པ་ལོག་ལྟ་ཡིན་ཟེར་བའི་རྗེས་སུ་མི་འབྲང་གསུངས། །དཔེ་ནག་ཤོད་རྒྱལ་འབྱུང་ལྟ་བུ་ཡིན་གསུང་སྟེ། ཁོང་བླ་མས་ཇི་ཙམ་སྒོམ་བཏབ་ཀྱང་མི་གཏུབ་པ་ལ་བླ་མས་ཁྱོད་སྔར་བླ་མ་གཞན་ཡོད་དམ་གསུངས་པས་སྔར་སྔགས་པ་ཞིག་ཡོད་པ་དེ་དང་བགྲས་ཚུལ་ཞུས་པས་དེར་སྡིག་བཤགས་དང་འཁོན་ལྡུམ་བྱེད་དུ་བཅུག་པས་དེ་ནས་བཟུང་སྒོམ་ཐུབ་པ་བྱུང་གསུངས། ། ༈རྡོ་རྗེའི་གསུང་༦པ། རྟོགས་པ་སྐྱེ་པའི་ཐབས་མོས་གུས་ཁོ་ནར་ངེས། །བྱ་བ་ལ་ཀྱེ་རྡོ་རྗེ་ལས། གཞན་གྱིས་བརྗོད་མིན་ལྷན་ཅིག་སྐྱེས། །གང་དུ་ཡང་ནི་མི་རྙེད་དེ། །བླ་མའི་དུས་ཐབས་བསྟན་པ་དང་། །རང་གི་བསོད་ནམས་ལས་ཤེས་བྱ། །ཞེས་དང་རྒྱུད་བླར། རང་བྱུང་རྣམས་ཀྱི་དོན་དམ་དེ། །དད་པ་ཉིད་ཀྱིས་རྟོགས་བྱ་ཡིན། །ཞེས་སོ། །དེ་ཡང་བླ་མ་ལོངས་སྐུར་མཐོང་ཡང་ཤེས་སྒྲིབ་ཡོད་པས་ཆོས་སྐུར་མཐོང་བའམ་གོ་བའི་སྒོ་ནས་མོས་གུས་སྐྱེད་དགོས། །འཇིག་རྟེན་མགོན་པོས། རྡོ་རྗེ་འཆང་ཆེན་བླ་མ་ལ། །ཆོས་སྐུའི་འདུ་ཤེས་མ་བསྐྱེད་ན། །སེམས་ཉིད་རྟོགས་པ་ཁ་ལྟ་ཡིན། །རང་དང་གོང་མས་འཁྲེལ་བར་ཟད། །ཞེས་འདིར་གྲོལ་ལམ་ལ་མོས་གུས་ཁོ་ན་བརྩིགས་སུ་ཆེ། །

༡ ༡ ༡༣ ༈རྡོ་རྗེའི་གསུང་༧པ། ལྟ་བ་༼མཆོག་གྱུར་༽རྟོགས་པ་དང་ལྡན། བྱ་བ་ནི་སྤྱིར་མགོན་པོ་ཀླུས། ལྟ་བ་ཐམས་ཅད་སྤངས་པའི་ཕྱིར། །ཞེས་གསུངས་པས་ཕྱིར་རོལ་པ་ནས་བཟུང་དབུ་མའི་བར་གྱི་ལྟ་བར་གྱུར་ན་འཛིན་པ་བྱུང་བས་ལྟ་བར་ཁས་ལེན་པ་མེད་ཀྱང་ཅིས་ཀྱང་ལྟ་བ་ཞིག་དགོས་ཞེ་ན། དཔོན་སློབ་ཀྱི་རྟེན་འབྲེལ་ཚོགས་པ་ལས་བྱུང་བ། འཁོར་འདས་ཀྱི་ཆོས་ཐམས་ཅད་རང་སེམས་སུ་རྟོགས་ཤིང་སེམས་ཆོས་སྐུའི་སྤྲོས་པའི་མཐའ་དང་བྲལ་བར་རྟོགས་པ་དེ་ཡིན་ཏེ། ལྟ་བ་དང་རྟོགས་པ་དེ་ཉིད་དབྱེར་མེད་གཅིག་ཏུ་གྱུར་པ་ཡིན་པས་འདི་༼མཐོང་ལམ་ཡིན་གསུངས་༽ལྟ་བུའི་རྟོགས་པ་དང་ལྡན་དགོས་གསུངས། །དེས་ན་༈རྡོ་རྗེའི་གསུང་༧པ། ཆེན་པོ་གསུམ་གྱིས་མ་རེག་པའི་རྟོགས་པ་ཡིན། བྱ་བ་འདི་གསུངས། ཆེན་པོ་གསུམ་ནི་དབུ་མ་ཆེན་པོ། ཕྱག་རྒྱ་ཆེན་པོ། རྫོགས་པ་ཆེན་པོའོ། །དེ་གསུམ་གྱིས་ཀྱང་མཚོན་མི་ནུས་ཏེ། དཔལ་ཕག་མོ་གྲུབ་པས། ཕྱག་རྒྱ་ཆེན་པོ་དཔེ་ནི་མཚོན་དུ་མེད། །དཔེ་ཡིས་མཚོན་ན་འདུས་བྱས་རྐྱང་པ་ཡིན། །ཞེས་དོན་གནས་ལུགས་མ་རྟོགས་ན་མིང་ཇི་ཙམ་ཆེ་ཡང་མི་ཕན་ནོ། །འོ་ན་མིང་དང་གྲུབ་མཐའ་བཞག་པ་ལ་དགོས་པ་མེད་དམ་སྙམ་ན་མ་ཡིན་ཏེ། ཁང་ཐོག་འགྲོ་བའི་སྐས་དང་། ཟླ་བ་སྟོན་པའི་འཛུབ་མོ་ལྟ་བུ་སྟེ་ཁང་ཐོག་ཏུ་མ་འགྲོ་བར་སྐས་ལ་འཇུ་བ་དང་། འཛུབ་མོས་སྟོན་པའི་ཟླ་བར་མི་ལྟ་བར་འཛུབ་མོ་ལ་ལྟ་བ་ནི་མཁས་པ་མ་ཡིན་པར་ཤེས་པར་བྱའོ། །དོན་ཤེས་ན་མིང་ནི་གང་ཡང་འདགས་སུ་རུང་སྟེ། རྗེ་སྒམ་པོ་པས། ངའི་སེམས་ཀྱི་ངོ་བོ་མཐོང་བ་དཀར་པོ་ཆིག་ཐུབ་བྱ་བ་ཡིན་གསུངས་པར་ལྟར་སྨན་གྱི་མིང་ལྟར་རོ། །

༢ ༡ ༡༣ ༈རྡོ་རྗེའི་གསུང་༩པ། ཐོས་བསམ་སྒོམ་པའི་སྟོང་ཉིད་ནི་ཤོར་གོལ་ཡིན། བྱ་བ་ནི་སླར་ནན་ཏན་སྟེ། ཞལ་སྔ་ནས། ཚུལ་ཇི་ལྟར་ཡིན་ན། བྱམས་པས། ཕྲ་ཕྱིར་ཐོས་པའི་ཡུལ་མིན་ཏེ། །དོན་དམ་ཕྱིར་ན་བསམ་པས་མིན། །ཆོས་ཉིད་ཟབ་ཕྱིར་འཇིག་རྟེན་པའི། བསྒོམ་པ་ལ་སོགས་ཡུལ་མ་ཡིན། །གསུངས་པས། གང་ཟག་གི་རིགས་པས་གཞལ། བློས་བརྟགས། ཚིག་གིས་གཏན་ཀ་ཕབ་པའི་སྟོང་པ་ཉིད་དེ། སྟོང་ཉིད་ཀྱི་དོན་ཞིག་བློ་ཡུལ་དུ་བྱས་པ་ཡིན། །མདོར་ན་འཇིག་རྟེན་མགོན་པོས། མོས་གུས་ཚད་དུ་མ་ཕྱིན་པར། །ཐོས་དང་བསམ་པའི་ཤེས་རབ་ཀྱིས། །བརྟགས་ཤིང་དཔྱད་པའི་སྟོང་ཉིད་ཀྱང་། །བློས་བྱས་སྟོང་པར་བླ་མས་བཞེས། །སོགས་ཀྱིས་ཤོར་ས་བཞི་དང་གོལ་ས་གསུམ་ལས་འདས་པ་གང་ལྟར་ལྟ་བ་གཏན་ལ་ཕབ་པ་ནི་གོང་དུ་སོང་བ་བཞིན། དཔོན་སློབ་ཀྱི་རྟེན་འབྲེལ་ཚོགས་པ་ལས་བྱུང་བ། འཁོར་འདས་ཀྱི་ཆོས་ཐམས་ཅད་རང་སེམས་སུ་རྟོགས་ཤིང་སེམས་ཆོས་སྐུའི་སྤྲོས་པའི་མཐའ་དང་བྲལ་བར་རྟོགས་པ་དེ་ཡིན། །དེ་ལྟར་རྡོ་རྗེའི་གསུང་༧པ་༨པ་༩པས་ལྟ་བ་བཤད་ནས་སྒོམ་པ། ༈རྡོ་རྗེའི་གསུང་༡༠པ། རྟོགས་པ་གོམས་པར་བྱེད་པ་སྒོམ་པ་ཡིན། བྱ་བ་ནི་ཞལ་སྔ་ནས། དེ་ཡང་དཔོན་སློབ་ཀྱི་རྟེན་འབྲེལ་ཚོགས་པ་ལས་བྱུང་བ་ཆེན་པོ་གསུམ་གྱིས་མ་རེག་པའི་རྟོགས་པ་དེ་ལ་གོམས་ཤིང་འདྲིས་པར་བྱེད་པ་ལ་སྒོམ་ཟེར་བ་ཡིན། །གསུངས། །འདིའི་སྐབས་སུ་དྲན་པ་ཤིན་ཏུ་གལ་ཆེ་བ་ཡིན་གསུངས་ཤིང་བྱང་ཕྱོགས་སོ་བདུན་དྲན་པའི་སྟེང་ནས་ཉམས་སུ་ལེན་ཚུལ་གསུངས། །མཁན་པོ་ཉིད་འབྲི་གུང་བསྟན་འཛིན་ཉི་མ་མཇལ་ཚེ་ཁོང་གིས། མཐར་ཐུག་ཆོས་སྐུ་ནི་དྲན་པ་རེད། ཅེས་གསུངས་གསུངས། །གང་ལྟར་དྲན་པ་ལ་རྩོལ་བཅས་དང་རྩོལ་མེད་གཉིས། ལས་དང་པོ་པས་རྩོལ་བཅས་དྲན་པ་ཡང་ཡང་བསྟེན་པས་རྩོལ་མེད་ཀྱི་དྲན་པ་མངོན་དུ་བྱེད་དགོས། གསུངས། །མགོན་པོས། དུས་གསུམ་སངས་རྒྱས་ཀྱི་གཞུང་ལམ་དེ། །དུས་རྒྱུན་ཆད་མེད་པའི་དྲན་པ་ཡིན། །དྲན་པ་རྒྱུན་ཆགས་དེ་མ་ཤེས་ན། །ལུས་ངག་ཏབ་ཏབ་ཀྱི་ཁ་ན་མེད། །གསུངས་པ་བཞིན་ནོ། །ད་སྤྱོད་པ་ལ་༈རྡོ་རྗེའི་གསུང་༡༡པ། སྤྱོད་པ་བླང་དོར་བྲལ་བ་ཚུལ་འཁྲིམས་རིན་པོ་ཆེ་ཡིན། བྱ་བ་མདོར་བསྔུ་ན་ཞལ་སྔ་ནས། ལྟ་བ་རྟོགས་པ་དང་ལྡན་པ་དེ་བསྲུང་བ་ལ་སྤྱོད་པ་བླང་དོར་བྲལ་བ་ཚུལ་འཁྲིམས་རིན་པོ་ཆེ་ཞིག་ཅིས་ཀྱང་དགོས་གསུངས་པས། གོང་གི་ལྟ་སྒོམ་གཉིས་ཀྱི་ཤུགས་ལས་བྱུང་བའི་ཆགས་སྡང་བྲལ་བའི་སྤྱོད་པ་རང་གི་རྒྱུད་ཚོད་དང་བསྟུན་ནས་སྤྱོད་དགོས་པས་འདུལ་བའི་ཚུལ་འཁྲིམས་རིན་པོ་ཆེན་ཉིད་ཡིན་པ་ལས་སྙད་མུ་གེ་ལ་བཏགས་ནས་སྣམ་བུ་བོར་ཚོང་བྱེད་པ་ལྟར་སྙད་གསང་སྔགས་ལ་བཏགས་ནས་འདོད་ཡོན་ལ་ཆགས་པས་སྦྱོར་བ་དང་སྡང་བས་དགྲ་ལ་སྒྲོལ་བའི་མཐུ་སོགས་ནི་ནམ་ཡང་བླང་དོར་བྲལ་བའི་དོན་མིན་པས་མདོར་ན་སྤྱོད་པ་ཆགས་སྡང་བྲལ་བ་ཡིན་གསུངས། །མགོན་པོས། བླང་དོར་མེད་པའི་སྤྱོད་པ་དེ། །ཆགས་སྡང་མེད་པའི་ལུས་ངག་ཡིན། །གོ་བ་འཛོལ་ན་འཁོར་བར་འཁྱམས། །ཞེས་གསུངས་སོ། །

༣ ༡ ༡༣ ༈རྡོ་རྗེའི་གསུང་༡༢པ། ལྟ་སྒོམ་སྤྱོད་གསུམ་གཅིག་པ་ཡིན། བྱ་བ་ནི་ལྟ་བས་ཇི་ལྟར་ཐག་བཅད་པ་འམ་མཐོང་བ་བཞིན་སྒོམ་པས་གོམས་ཤིང་དེ་མཐུན་གྱི་སྤྱོད་པ་སྤྱད་པས་འབྲས་བུ་སྒྲུབ་དགོས། །དཔེར་ན་ལྟ་བ་སྤྲོས་མཐའ་བྲལ་བས་ཆགས་སྡང་ག་ལ་ཡོད། དེ་བཞིན་སྒོམ་པས་དེ་བསྟུན་ཀྱིས་ཆགས་སྡང་བྲལ་བ་ལ་གོམས། དེས་ན་སྤྱོད་པ་ཆགས་སྡང་བྲལ་བ་ཚུལ་ཁྲིམས་རིན་པོ་ཆེ་འདི་བྱུང་། །དེས་ན་རྗེ་ཕག་མོ་གྲུབ་པས། ལྟ་བ་སྒོམ་པ་སྤྱོད་པ་གསུམ། །རྟོགས་པ་གཅིག་ལ་ཚང་གྱུར་ན། །འབྲས་བུ་ཚེ་འདི་ཉིད་ལ་འཐོབ། །ཅེས་དང་། ལྟ་སྒོམ་སྤྱོད་གསུམ་གཅིག་ན་སྐུ་གསུམ་རྒྱུན་ཆད་མེད། །ཞེས་གསུངས། །འདིའི་དོན་ཤིན་ཏུ་གསལ་བ་སླར་ཡང་འདི་གསུངས་ཏེ། ༈རྡོ་རྗེའི་གསུང་༡༣པ། ཕྱག་རྒྱ་ཆེན་པོ་དང་ཚུལ་འཁྲིམས་གཅིག་པ་འཇིག་རྟེན་མགོན་པོའི་ཁྱད་ཆོས་བླ་ན་མེད་ཡིན། བྱ་བ་ལ་ཞལ་སྔ་ནས། དེ་ཡང་རྒྱུ་མཚན་བཞིས་གཅིག་སྟེ། མཚུངས་པར་གཅིག་པ། ཕན་ཚུན་འབྲེལ་པ་གཅིག་པ། བྱེད་པའི་ལས་གཅིག་པ། གཤིས་སྟོང་པ་ཉིད་དུ་གཅིག་པ་དང་བཞི་ཡིན་གསུངས། །དང་པོ། སེམས་རྟོགས་ན་ཆགས་སྡང་མེད་པས་ཚུལ་ཁྲིམས་བསྲུང་བ་དང་གཅིག །ཚུལ་ཁྲིམས་ལེགས་པར་བསྲུང་ན་ཆགས་སྔང་བྲལ་བས་སེམས་རྟོགས་ཏེ་སེམས་མ་རྟོགས་པའི་སྐྱོན་གློ་བུར་དེ་དང་བྲལ་བའི་ཕྱིར། །དེས་ན་རྒྱུད་བླར། སེམས་ཅན་བདེ་གཤེགས་ཁམས་མེད་ན། །སོགས་གསུངས་པ་བཞིན་སེམས་ཇི་ཙམ་རྟོགས་པ་དེ་ཙམ་ཚུལ་ཁྲིམས་དག་པར་གྱུར་པ་གསུངས། །གཉིས་པ་ནི། ཚུལ་ཁྲིམས་ནི་གཞི་དང་འདྲ་ཡང་སངས་མ་རྒྱས་བར་དུ་ལྟ་བ་ཕྱག་ཆེན་བཞིན་དགོས་ཏེ། མགོན་པོས། མཐར་ཐུག་སྟོབས་བཅུ་མ་ཐོབ་བར། །ལུས་སྲོག་ཕྱེ་མར་བྱས་ཀྱང་བླ། །སྟོན་པས་གསུངས་པའི་ཚུལ་འཁྲིམས་དང་། །སྐད་ཅིག་ཙམ་ཡང་མ་འབྲལ་ཅིག །ཅེས་གསུངས། །གསུམ་པ་ནི། གཉིས་ཀས་སྐྱོན་སྤོང་བ་དང་ཡོན་ཏན་འགྲུབ་པ་ལ་གཅིག་པ་ཡིན། །སྤྱིར་ཕྱག་རྒྱ་ཆེན་པོའི་ལྟ་བ་ཡངས་པས་ཚུལ་ཁྲིམས་དག་པ་ནི་ཤོང་བའམ་ཤིན་ཏུ་འཐད་ཅིང་འགལ་ཟླ་ཚུལ་འཆལ་མི་ཤོང་བའམ་གནས་མེད་དེ་ལྟ་བ་དེ་ཉིད་མཐོང་བའི་ལམ་དང་དེ་ལ་འདྲིས་པའི་སྒོམ་ལམ་གྱིས་སྤོང་བ་འགྱུར་བའི་ཕྱིར་ཡོན་ཏན་གྲུབ་ཅིང་སྐྱོན་སྤོང་བའང་མཉམ། །ཅི་སྟེ་སྟོང་རྐྱང་དྲེད་པོ་དག་གིས། ཕྱག་རྒྱ་ཆེན་པོ་ནམ་མཁའ་ཡངས་པ་ལ། །དག་པའི་ཚུལ་ཁྲིམས་བསྲུངས་བ་མི་ཤོང་ཞིང་། །ཉེས་སྐྱོན་མཐའ་དག་ཤོང་བ་གྱུར་པ་འདི། །མཐོང་དང་སྒོམ་པས་སྤོང་བ་མི་འགྱུར་ཞིང་། །ཞེས་པ་ལྟར་ཚུལ་ཁྲིམས་དག་པ་ཕྱག་ཆེན་ལ་མི་ཤོང་ན་སྐྱོན་སྤོང་མི་ནུས་པ་དང་ཡོན་ཏན་འགྲུབ་མི་ནུས་པ་འང་མཚུངས་པ་ཡིན། །བཞི་པ་ནི། སླ་སྟེ་ཚུལ་འཁྲིམས་རང་བཞིན་ཀྱང་སྟོང་ཉིད་ཡིན་ལ་ཕྱག་ཆེན་གྱི་རང་བཞིན་ཀྱང་སྟོང་ཉིད་ཡིན་པར་གཅིག་གོ །རྒྱས་པར་འགྲེལ་པར་གཟིགས། །

༤ ༡ ༡༣ ༈རྡོ་རྗེའི་གསུང་༡༤པ། ཕྱག་རྒྱ་ཆེན་པོ་ཡོན་ཏན་ཐམས་ཅད་ཀྱི་བདག་ཉིད་ཡིན། བྱ་བ་ལ་ཞལ་སྔ་ནས་རྒྱུད་བླར། འདི་ལ་བསལ་བྱ་ཅི་ཡང་མེད། །བཞག་པར་བྱ་བར་ཅུང་ཟད་མེད། །ཡང་དག་ཉིད་ལ་ཡང་དག་ལྟ། །ཡང་དག་མཐོང་ནས་རྣམ་པར་གྲོལ། །ཞེས་གཞི་ལམ་འབྲས་བུ་གང་གི་སྐབས་སུ་ཡང་ཡོན་ཏན་གྱི་བདག་ཉིད་དུ་ཡོད་དེ། དཔེར་ན་གཞིའི་དུས་སུ་མནར་མེད་དུ་རླུང་སེར་བུ་ལྡང་བ་ཚུན་དང་སེམས་ཅན་རྣམས་ཐ་ན་སྡུག་བསྔལ་ཕྲ་མོ་ཡང་མི་འདོད་ཅིང་ཐར་འདོད་པ་སོགས་ནི་དེའི་ནུས་པ་སྟེ། དེ་ཉིད་ལས། གལ་ཏེ་སངས་རྒྱས་ཁམས་མེད་ན། །སོགས་དང་། ལམ་དུས་སུ་དེ་ཉིད་གོམས་པས་ས་རྣམས་ཀྱི་ཡོན་ཏན་རིམ་བཞིན་སྐྱེ་བ་དང་། འབྲས་དུས་སུ་དེ་ཉིད་མངོན་དུ་གྱུར་ནས་འཕྲིན་ལས་ནམཁའ་དང་མཉམ་པར་འབྱུང་བ་འོ། ། ༈རྡོ་རྗེའི་གསུང་༡༥པ། མཉམ་བཞག་ལ་ཡོན་ཏན་ཐམས་ཅད་འབྱུང་བ་ཡིན། བྱ་བ་ནི་རྡོ་རྗེའི་གསུང་གོང་མ་ཐག་པ་དེའི་ལམ་དུས་ཀྱི་ཡོན་ཏན་དམིགས་ཀར་བརྗོད་དེ། ཞལ་སྔ་ནས་མཉམ་བཞག་༼ཇི་ཙམ་ཐུག་པོར་གྱུར་པ་དང་༽རྒྱ་ཇི་ཆེར་སོང་བ་ལ་བརྟེན་ནས་ཡོན་ཏན་གྱི་རྒྱ་ཡང་ཇེ་ཆེར་འགྱུར་ཏེ། སྒྲིབ་ཇི་ཙམ་སངས་པ་བཞིན་རྗེས་༼ཐོབ་ཀྱི་༽ཤེས་༼པ་༽ཇེ་ཆུང་། རྗེས་ཆེས་ཇི་ཙམ་ཆུང་བ་བཞིན་དུ་མཉམ་བཞག་ཇེ་ཆེ། མཉམ་བཞག་༼ཇི་ཙམ་༽ཆེ་བ་ཙམ་དུ་ཡོན་ཏན་ཇེ་ཆེར་གྱུར་ཏེ། རིམ་གྱིས་ས་བཅུའི་བར་དུ་ཟླ་བ་ཡར་གྱི་ངོ་བཞིན་དུ་འགྱུར་བས། ཞེསོ། འབྲས་དུས་སངས་རྒྱས་ལ་ནི་མཉམ་བཞག་ཁོ་ན་ཡིན་པས་མཉམ་བཞག་ལ་ཡོན་ཏན་ཐམས་ཅད་འབྱུང་བ་ཡིན། །༈རྡོ་རྗེའི་གསུང་༡༦པ། རྒྱུ་མ་བསྒྲུབས་ན་ནི་ཡོན་ཏན་ཐམས་ཅད་མི་འབྱུང་། བྱ་བ་ནི་གོང་མའི་དོགས་གཅོད་དེ། ཕྱག་ཆེན་མཉམ་བཞག་དེ་ཉིད་གོམས་པའི་རྒྱུ་ལས་ས་བཅུ་དང་སངས་རྒྱས་ཀྱི་ཡོན་ཏན་རྣམས་འབྱུང་དགོས་པ་གོ་དགོས། །ཞོ་དཀྲོག་པའི་རྒྱུ་ལ་བརྟེན་ནས་མར་བྱུང་བ་བཞིན་ནོ། །༈རྡོ་རྗེའི་གསུང་༡༧པ། སྟོང་ཉིད་རྟོགས་ན་སྟོང་ཉིད་རྒྱུ་འབྲས་སུ་འབྱུང་། བྱ་བ་ནི་བཀའ་གདམས་གསར་རྙིང་གཉིས་ལ་ཤིན་ཏུ་རྒྱས་པར་བྱུང་ཞིང་དཔེ་ཙམ་མཚོན་ན། རྗེ་བློ་བཟང་གྲགས་པས། དེ་ཀུན་ངོ་བོས་སྟོང་པ་དང་།་།དེ་ལས་དེ་འབྲས་བྱུང་བ་དང་། །ངེས་པ་གཉིས་པོ་ཕན་ཚུན་དུ་། །གེགས་མེད་པར་ནི་གྲོགས་བྱེད་པ།་།ཞེས་དང་། །གཞན་ཡང་སྣང་བས་ཡོད་མཐའ་སེལ་བ་དང་། །སྟོང་པས་མེད་མཐའ་སེལ་ཞིང་སྟོང་པ་ཉིད། །རྒྱུ་དང་འབྲས་བུར་འཆར་བའི་ཚུལ་ཤེས་ན། །མཐར་འཛིན་ལྟ་བས་འཕྲོག་པར་མི་འགྱུར་རོ། །ཞེས་གསུངས་པས་མཚོན་ནུས། །འགངས་ཀྱང་ཤིན་ཏུ་ཆེ། །

༥ ༡ ༡༣ ༈རྡོ་རྗེའི་གསུང་༡༨པ། རྟོགས་ལྡན་ལ་ཐབས་ལམ་སོགས་ལྷག་པར་དགོས། བྱ་བ་ལ་རིན་ཆེན་ཐེམ་སྐས་ལས། བསམ་གཏན་དངོས་གཞི་མ་ཐོབ་བར། །ཆོས་ཉིད་རྟོགས་ཀྱང་ཡོན་ཏན་མེད། །དེ་བས་གཏུམ་མོ་བསྒོམ་པར་བྱ། །ཞེས་ཐུན་མིན་སྔགས་ལ་དེ་ལྟར་བྱ་སྟེ་རྗེ་མི་ལ་དགུང་ལོ་བཞི་བཅུ་རྩ་བཞི་ནས་བརྒྱད་ཅུ་རྩ་བཞིའི་བར་གཏུམ་མོ་གཙོ་གྱུར་གྱི་ཐམས་ལམ་གྱི་རྩལ་སྦྱངས་པ་བཞིནོ། ། ལམ་སྤྱིའི་དབང་དུ་ནི། སློབ་དཔོན་འཕགས་པས། དེ་ལྟར་རྣལ་འབྱོར་པ་རྣམས་ཀྱིས། །སྟོང་ཉིད་འདི་ནི་སྒོམ་བྱས་ནས། །བློ་ནི་གཞན་དོན་ལ་དགའ་བར། །གྱུར་པ་འདི་ལ་ཐེ་འཚོམ་མེད། །ཅེས་དང་། བྱམས་པས། མགོ་ལ་སེམས་ཅན་འཁུར་ཆེན་ཁྱེར་བ་ཡི། །སེམས་དཔའ་མཆོག་རྣམས་དལ་གྱིས་འགྲོ་མི་མཛེས། །ཞེས་གསུངས་པ་བཞིན་བྱང་ཆུབ་སེམས་དཔའ་ཀུན་ཏུ་བཟང་པོ་བཞིན་སངས་རྒྱས་ཀྱང་ཚོགས་གཉིས་ལ་ཆོག་མི་ཤེས་པའི་ཕྱིར་བཟང་པོ་སྤྱོད་པའི་སྨོན་ལམ་བཞིན་ཐབས་ཀྱི་སྤྱད་པ་སྤྱོད་པ་བཞིན་ནོ། ། ༈རྡོ་རྗེའི་གསུང་༡༩པ། ཚུལ་འཁྲིམས་ལ་གཅེས་སྤྲས་སུ་བྱ་བ་རིགས་༼པ་བརྟུལ་ཞུགས་ཀྱི་༽སྤྱོད་༼པ་༽ཁྱད་པར་དུ་འཕགས། བྱ་བ་ལ་ཞལ་སྔ་ནས། དེ་ལ་བརྟུལ་ཞུགས་ཞེ་བྱ་བ་ནི་སྤང་བྱ་ཉོན་མོངས་པ་དང་རྣམ་རྟོག་བརྟུལ་ནས་གཉེན་པོ་ཡེ་ཤེས་ཀྱི་སྟོབས་ལ་ཞུགས་པ་རིག་པ་བརྟུལ་ཞུགས་ཀྱི་སྤྱོད་པ་ཟེར་བས་བརྟུལ་ཞུགས་དེ་ལྟ་བུ་ནི་ཚུལ་འཁྲིམས་ཁོ་ན་ཡིན་ཏེ། ཐུབ་པ་ཆེན་པོས་གནས་དང་གནས་མ་ཡིན་པ་མཁྱེན་པའི་ཡེ་ཤེས་དང་ལྡན་པ་དེས་བཅས་པའི་འགག་སྒྲུབ་ཀྱི་སླབ་པ་རིན་པོ་ཆེ་འདི་ཁོ་ན་རིགས་སྤྱོད་ཁྱད་པར་དུ་འཕགས་པ་ཡིན། །ཞེས་འགྲེལ་པའི་གསུང་སོར་བཞག་ལས་བཤད་པ་བྱེད་མ་ནུས་སྟེ། གཏིང་པོགས་དཀའ་བ་ལྟ་བུ་ལགས། །༈རྡོ་རྗེའི་གསུང་༢༠པ། བྷུ་སུ་ཀུ་ཆོས་གསུམ་མེད་ན་ཞི་བ་ཉན་རང་ཡིན། བྱ་བ་ཞལ་སྔ་ནས་བྱུང་བའི་དོན་བསྡུས་ན། སྤྱིར་ལུ་ཨི་པ་དང་ཞི་བ་ལྷ་ལྟ་བུ་བྷུ་སུ་ཀུའི་སྤྱོད་པ་མ་གཏོགས་ཐམས་ཅད་བཞག་ཏེ་བསམ་སྒོམ་ལ་འཇུག་པ་ལ་གོ་རུང་ཡང་འདིར་ཆོས་གསུམ་ནི། ༡ཉེས་པའི་སྤུ་རིས་མཐོང་བ་ཚུལ་འཁྲིམས། ༢ཡོན་ཏན་དགོས་པར་གོ་བའི་སྒྲུབ་པ། ༣ཚད་མེད་སྙིང་རྗེས་བསྐུལ་བའི་གཞན་ཕན་དང་གསུམ་ནི་རིམ་པ་བཞིན་དང་པོས་ཉེས་སྤྱོད་བསྡོམ་པའི་ཚུལ་འཁྲིམས། གཉིས་པས་དགེ་བ་ཆོས་སྡུད་ཀྱི་ཚུལ་འཁྲིམས། གསུམ་པས་སེམས་ཅན་དོན་བྱེད་ཀྱི་ཚུལ་འཁྲིམས་སྒོ་ནས་འགྲེལ་པ་བྱེད་དོ། །དེ་ལྟ་བུ་མེད་ན་ཉན་རང་ལ་ལྷུང་ཉེན་པས་གསུངས། །དེ་དག་གི་ལྟ་བསྒོམ་སྤྱོད་པའི་ཟིན་བྲིས་ལགས་སོ།། །།