6-10/1/13.དགོངས་གཅིག་ཟིན་བྲིས། gongchig note घोड चीग चारचा

འབྲི་གུང་མཁན་ཆེན་དཀོན་མཆོག་རྒྱལ་མཚན་ལ་ན་མོ།

༦ ༡ ༡༣༈ དགོངས་གཅིག་འབྲས་བུའི་གནད་བསྡུས་ཀྱི་འཚོམས་རྡོ་རྗེའི་གསུང་༡༥ལས་ ༡པོ། སངས་རྒྱས་ཀྱི་སར་བདེན་པ་གཉིསུ་མེད། བྱ་བ་ལ་ཞལ་སྔ་ནས། ཆོས་ཐམས་ཅད་རང་གི་སེམས། སེམས་སྤྲོས་པ་དང་བྲལ་བ། གང་གི་མཐར་མ་ལྷུང་བའི་གདོད་ནས་གནས་པ་དེ་སངས་རྒྱས་ཀྱིས་མངོན་དུ་བྱས་པས་དེ་དང་མཉམ་ཉིད་དུ་གྱུར་པས། བདེན་གཉིས་དབྱེར་མེད་སོགས་གཉིས་ཆོས་ལས་འདས་གསུངས། །དགེ་ལྡན་པས་ནི་བདེན་གཉིས་དབྱེར་མེད་ལ་འདི་ལྟར་བཤད་དེ་དོན་དམ་བདེ་སྟོང་དབྱེར་མེད་ཀྱི་ཡེ་ཤེས་ཀྱི་ཐུགས་དང་ཀུན་རྫོབ་དེ་ལས་ཤར་བའི་གཟུགས་སྐུ་སྒྱུ་ལུས་གཉིས་དབྱེར་མེད་དེ་གསང་འདུས་ལས་ཁྱོད་ཀྱི་སྐུ་གསུང་ལྟ་བུ་གསུང་ཐུགས་ལྟ་བུ་སྐུ་གསུང་ཐུགས་དབྱེར་མེད་པ་མི་ཟད་པ་རྒྱན་གྱི་འཁོར་ལོ་ལ་ཟེར་སྙམ། ། ༈རྡོ་རྗེའི་གསུང་༢པ།  ཡེ་ཤེས་ནི་གཉིས་སུ་མེད་པའི་ཡེ་ཤེས་ཁོ་ན། བྱ་བ་ནི་རྣམ་རྟོག་ཕྲ་རགས་ཀུན་འགག་པས། སེམས་དགག་པ་ཡི་སྐུ་ནི་མངོན་དུ་མཛད། ་ཅེས་པ་དང། ཡེ་ཤེས་གཅིག་ཡོད་ནི་ཡོད་དེ། མཁྱེན་པའི་ཡེ་ཤེས་སྐད་ཅིག་གིས། །ཤེས་བྱའི་དཀྱིལ་འཁོར་ཀུན་ཁྱབ་ཅན། །ཞེས་ཡོད་མེད་གཉིས་ཆོས་ཀྱི་མཐའ་ལས་འདས་པ་ཁ་ནའོ། ། ༈རྡོ་རྗེའི་གསུང་༣པ། སྒྱུ་མ་ལྟ་བུའི་ཆོས་ལས་ཡང་དག་འདས། བྱ་བ་ནི་ཞལ་སྔ་ལས། སངས་རྒྱས་བཅོམ་ལྡན་འདས་ནི་འཁོར་འདས་ཀྱི་ཆོས་མ་ལུས་པ་སྤྲོས་པའི་མཐའ་ཐམས་ཅད་དང་བྲལ་བའི་ངོ་བོར་སངས་རྒྱས་པ་ཡིན་ལ། གསུངས་པས་དེར་སྒྱུ་མ་དང་སྒྱུ་མ་ལྟ་བུ་ནི་ག་ལ་ཡོད། །འོན་ཏེ་གོང་དུ་ཞུས་པའི་ཟུང་འཇུག་གི་སྒྱུ་མའི་སྐུ་ནི་ཡོད་དེ་གཟུགས་སྐུ་ཡིན་པའི་ཕྱིར། །

༈༧ ༡ ༡༣ རྡོ་རྗེའི་གསུང་༡༥ལས་༤པ། སངས་རྒྱས་དུས་རྟག་ཏུ་ཚད་མ་བཞུགས། བྱ་བ་ནི་སྟོབས་བཅུ་ལྡན་པ་སོགས་ཀྱི་ཤེས་ལ། ཕྱོགས་ཀྱི་གླང་པོས་ཀྱང་། ཚད་མར་གྱུར་པ་འགྲོ་ལ་ཕན་བཞེད་པ། །སྟོན་པ་བདེ་གཤེགས་སྐྱོབས་ལ་ཕྱག་འཚལ་ལོ། །ཞེས་སོ། །༈ རྡོ་རྗེའི་གསུང་༥པ། བྲལ་བའི་འབྲས་བུ་ཡེ་ཤེས་ཐུགས་ཅན། བྱ་བ་ནི་བྲལ་སྨིན་གྱི་ཡོན་ཏན་དྲུག་ཅུ་རྩ་བཞི་ལ་གསུངས་པ་འདྲ་སྙམ་པ་ལས་བཤད་མ་སྤོབས་སོ། །༈ རྡོ་རྗེའི་གསུང་༦པ། ཆོས་སྐུ་ཡོན་ཏན་མཛད་པ་དང་བཅས་པ། སངས་རྒྱས་ཀྱི་ཆོས་སྐུ་མཐར་ཐུག་དེ་བརྙེས་པས། ཆོས་སྐུ་དེའི་ཡོན་ཏན་ལོངས་སྤྱོད་རྫོགས་སྐུ་དང་། ཆོས་སྐུ་དེའི་འཕྲིན་ལས་སྤྲུལ་པའི་སྐུ་བྱུང་གསུངས། །

༨ ༡ ༡༣༈ རྡོ་རྗེའི་གསུང་༧པ། སངས་རྒྱས་ས་ན་ཐུགས་བསྐྱེད་ཡོད། བྱ་བ་ནི་མཁན་པོས། ཐུགས་བསྐྱེད་ཅེས་པ་འཕྲིན་ལས་རྒྱུན་མི་ཆད་པར་འཇུག་པ། གསུངས། །དཔེར་ན་ཡབ་སྲས་མཇལ་བའི་མདོ་ལས། དཔའ་བོ་རྣམས་ནི་ཐབས་མཁས་ཏེ། །བྱེ་བ་བརྒྱད་ཅུར་རྒྱལ་བ་ཉིད། །སངས་རྒྱས་ཉིད་དུ་བསྟན་གྱུར་ཀྱང་། །ད་དུང་ཆོག་པའི་འདུ་ཤེས་བསལ། །དཔའ་བོ་ཆེན་པོ་རྣམ་པར་འཕྲུལ། །བྱང་ཆུབ་མཆོག་ཏུ་ཐུགས་ཀྱང་འཇུག །ཞེས་པས་ཐེག་ཆེན་ལྟར་ན་བདག་ཅག་སྟོན་པ་ཡང་བསྐལ་པ་སྔོན་ནས་སངས་རྒྱས་ཟིན་ནས་སླར་ཡང་རྩོད་ལྡན་ཀྱི་དུས་འདིར་རྡོ་རྗེ་གདན་དུ་སངས་རྒྱས་པར་བསྟན་པ་བཞིན་ནོ། །༈ རྡོ་རྗེའི་གསུང་༨པ། ཐུགས་གཅིག་བུ་ཡང་རྟག་ཆད་ཀྱི་ལྟ་བུ་ཚུན་དུ་བྱུང་། བྱ་བ་ནི་སངས་རྒྱས་ཀྱི་སྐུ་གསུང་གཉིས་མ་ཟད་ཐུགས་གཅིག་བུ་ཡང་སེམས་ཅན་ལ་ཕན་ན་རྟག་ཆད་ལ་སོགས་པ་ངན་པའི་རིགས་ཀྱང་འཕྲིན་ལས་མཛད་ཅེས་པའོ། །དེས་ན་

༩ ༡ ༡༣༈ རྡོ་རྗེའི་གསུང་༩པ། ཤེས་བྱ་ལ་སྲིད་ཚད་ཀྱི་སངས་རྒྱས་ཀྱི་བྱ་བ་བྱེད། བྱ་བ་ནི་སངས་རྒྱས་ཀྱིས་སེམས་ཅན་ལ་ཕན་ན་མཛད་པ་བཟང་པོ་མ་ཟད་ངན་པ་ལྟར་སྣང་བ་ཡང་མཛད་ཅེས་པའི་དོན་སྟེ་མདོར་ན། གང་ལ་གང་འདུལ་དེ་ལ་སྟོན་པ། །གསུངས་པ་དང་དོན་གཅིག་ཡིན་གསུངས། །༈ རྡོ་རྗེའི་གསུང་༡༠པ། ཆོས་ཀྱི་དབྱིངས་ཐམས་ཅད་དུ་སངས་མ་རྒྱས་ན་སངས་རྒྱས་སུ་མི་འགྱུར། བྱ་བ་ལ་སངས་རྒྱས་ཀྱི་ཞལ་ནས། ཚངས་༼སངས་རྒྱས་༽པ་ངས་ཡོངས་སུ་ཆད་པའི་རྣམ་པས་ཚད་དང་ལྡན་པར་སངས་རྒྱས་པར་མ་ཡིན་གྱི། ཚངས་པ་ང་ནི་ཚད་མེད་ད་ཅིང་རིས་སུ་མ་ཆད་པའི་རྣམ་པས་ཆོས་ཐམས་ཅད་མཉམ་པ་ཉིད་དུ་མངོན་པར་རྫོགས་པ་སངས་རྒྱས། །ཞེས་གསུངས་པ་ལྟ་བུ། །༈ རྡོ་རྗེའི་གསུང་༡༡པ། རྒྱུ་མེད་ཀྱི་སྤྲུལ་པ་མི་སྲིད་པས་རང་རྒྱུད་པ། བྱ་བ་ནི་འདིར་རང་རྒྱུད་པ་ཞེས་བྱ་བ་རང་བཞིན་གྲུབ་པ་ལ་གོ་མི་རུང་རྒྱུ་མེད་སངས་ཀྱི་འཕྲིན་ལས་མེད་པ་ལ་གསུངས་པ་ཡིན། །དེ་ཡང་སངས་རྒྱས་ཀྱིས་གདུལ་བྱ་འདུལ་བའི་དུས་ལ་བབས་ནས་འཕྲིན་ལས་མཛད་པར་བཞེད་པ་ན། འདུལ་བྱེད་ཀྱི་ཏིང་ངེ་འཛིན་འདི་ཞེས་བྱ་བ་ལ་སྙོམས་པར་ཞུགས་སོ། །གསུངས་པ་དེ་འདུལ་བྱེད་ཀྱི་འཕྲིན་ལས་འབྱུང་བའི་རྒྱུ་བསྒྲུབས་པ་ཡིན་པས་ཐམས་ཅད་རྒྱུ་ཅན་འབའ་ཞིག་ཡིན། །རྒྱུ་ལ་ལྟོས་མི་དགོས་པའི་ཆོས་ནི་གཅིག་ཀྱང་མེད་དེ། མ་སྐྱེས་དགྲའི་འགྱོད་པ་བསལ་བ་ལས། ཆོས་ཐམས་ཅད་ནི་རྒྱུའི་རྗེས་སུ་འགྲོ་བ། རྐྱེན་ལ་རག་ལས་པ། སྲེད་པའི་རྩ་བ་ཅན་ནམ་སྨོན་ལམ་གྱིས་ཐོག་དྲངས་པའོ། །ཞེས་སོ། །

༡༠ ༡ ༡༣༈ རྡོ་རྗེའི་གསུང་༡༢པ། སངས་རྒྱས་རྟེན་འབྲེལ་གྱི་སྐུ་ཡིན། བྱ་བ་ལ་ཞལ་སྔ་ནས། སངས་རྒྱས་རྣམས་ནི་ཆོས་སྐུ་རང་བཞིན་གྱིས་རྣམ་པར་དག་པ་བརྙེས་པ་དང་གཅིག སེམས་ཅན་རྣམས་སངས་རྒྱས་ཀྱི་སར་འགོད་པའི་ཐུགས་དམ་དང་གཉིས། གདུལ་བྱ་རྣམས་སངས་རྒྱས་ཐོབ་པའི་ལས་བསགས་པའི་དད་པ་དང་རྟེན་འབྲེལ་གསུམ་ཚོགས་གྱིས་སངས་རྒྱས་མཇལ་ཐུབ་གསུངས། །༈ རྡོ་རྗེའི་གསུང་༡༣པ། སྨོན་པས་ལོངས་སྐུ་དང་འཇུག་པས་སྤྲུལ་སྐུ་ཡང་འབྱུང་། བྱ་བ་མགོ་ཚོད་མ་སོང་། །༈ རྡོ་རྗེའི་གསུང་༡༤པ། སྐུ་གསུམ་ཐ་དད་མེད་པར་བཞུགས། བྱ་བ་ལ་ངའི་བསམ་ཚོད་བྱས་ན། ཆོས་སྐུའི་རང་གདངས་ལོངས་སྐུ་དང་དེ་གཉིས་འཕྲིན་ལས་སྤྲུལ་སྐུ། །ལོངས་སྐུའི་ངོ་བ་ཆོས་སྐུ་དང་དེ་གཉིས་དབྱེར་མེད་ཀྱི་འཕྲིན་ལས་སྤྲུལ་སྐུ། །སྤྲུལ་སྐུའི་ངོ་བ་ཆོས་སྐུ་དང་དེ་འཆར་གཞི་ལོངས་སྐུ་ཡིན་པས་སྐུ་གསུམ་ཐ་དད་མེད་པར་བཞུགས་སྙམ། །༈ རྡོ་རྗེའི་གསུང་༡༥པ། སངས་རྒྱས་ཐམས་ཅད་སེམས་ཅན་གྱི་ཁམས་རྒྱུད་ལ་བཞུགས། བྱ་བ་ནི་སྤྱིར་སངས་རྒྱས་ཀྱི་ཐུགས་ཀྱི་མ་ཁྱབ་པའི་ཆོས་མེད་པས་ཆོས་ཐམས་ཅད་སྟེང་དུ་བཞུགས་ཀྱང་སེམས་ཅན་རང་གི་རྒྱུད་ལ་བཞུགས་པ་ཤེས་ན་བག་ཡོད་སླེབས་པ་དང་བྱིན་རླབས་མྱུར་བ་དང་བསྐྱེད་རིམ་ཡོངས་གྲུབ་སྟེ་སྣང་སྲིད་དག་མཉམ་གྱི་མདུད་པ་མང་པོ་ཞིག་རང་གྲོལ་ལ་འགྱུར་རོ། །ཞེས་འབྲས་བུའི་ཚོམས་ཀྱི་ཟིན་བྲིས་གོག་མདོ་ལགས་སོ། །སྨྲས་པ། འཇིག་རྟེན་གསུམ་མགོན་མངོན་པར་སངས་རྒྱས་ནས། །རྡོ་རྗེའི་གསུང་གིས་དམ་བཅས་དགོ༵ངས་གཅི༵ག་ལ། །ཚངས་དང་དྲང་སྲོང་ཉན་རང་སེམས་དཔའ་ཡིས། །དཔོག་པར་ནུས་མ་ཡིན་ན་བདག་འདྲ་ཅིས། །འོན་ཏེ་བྱིས་པ་སྨྲ་བ་གོམས་པའི་ཕྱིར། །བླ་བརྡོལ་ཇི་ཙམ་སྒྲོག་པ་དེ་ཙམ་དུ། །བརྩེ་བའི་མ་རྣམས་ཞེ་ནས་དགའ་གྱུར་པས། །དམ་པའི་ཚོགས་ལ་མཆོད་པ་ཅིས་མི་འགྱུར།་།དེ་ཕྱིར་འདིར་འབྲེལ་ཉན་ཟིན་བྲིས་པ་དང་། །དམ་པའི་གསུང་ལ་གོམས་དང་འཁོར་འདས་ཀྱི། །རྣམ་དཀར་ཇི་སྙེད་བསགས་པ་དེ་དག་ཀུན། །འགྲོ་ཀུན་བྱང་ཆུབ་ཐོབ་པའི་རྒྱུ་རུ་བསྔོ་། །ཁྱད་པར་བདག་ནི་དྲང་པོར་གནས་པ་ལ། །འཇམ་པོའི་གཡོ་དང་རྩུབ་པོའི་དྲག་ཤུལ་གྱིས། །བདུད་ཀྱི་རིས་ཀྱིས་ནམ་ཡང་མི་གཡོ་བ། །ཕྱིར་མི་ལྡོག་པའི་བྱང་སེམས་ལྟ་བུར་ཤོག །ཧ་ཧ། ཀུན་ལ་འཁོ་ཞིང་ཀུན་དང་མི་མཐུན་པའི་བཤད་པ་ཡ་མཚན་པའི་དགོངས་གཅིག་ཟིན་བྲིས་རྫོགས་སོ།། །།སརྦ་མངྒ་ལཾ།། །།

 དགོངས་གཅིག་ཆོས་འཁོར་འཚོམས་རྡོ་རྗེའི་གསུང་༣༠ལས་༡པོ། སངས་རྒྱས་ཀྱི་ཆོས་ཐམས་ཅད་བབས་ཀྱི་གནས་ལུགས་བསྟན། །བྱ་བ་ལ་ངས་གོང་དུ་བྲིས་ཟིན་འདུག ༈རྡོ་རྗེའི་གསུང་༢པ། ཆོས་ཀྱི་ཕུང་པོ་བརྒྱད་ཁྲི་བཞི་སྟོང་ཡང་སངས་རྒྱས་སྒྲུབ་པའི་ཐབས་སུ་གཅིག བྱ་བ་ནི་ཇོ་བོ་བཀའ་གདམས་པས་གསུང་རབ་མ་ལུས་གདམས་པར་འཆར་བའི་དོན་དང་གཅིག་སྙམ། །༈ རྡོ་རྗེའི་གསུང་༣པ། སྡེ་སྣོད་གསུམ་དང་རྒྱུད་སྡེ་བཞི་ལམ་སྐྱེ་བའི་རིམ་པ། བྱ་བ་ནི་ཞལ་སྔ་ལས། དེ་རྣམས་གང་ཟག་གཅིག་གི་རྒྱུད་ལ་རིམ་པ་བཞིན་འབྱུང་སྟེ། །གསུངས་པ་བཞིན་སྤྲུལ་སྐུ་གསུང་རབ་པས། ཐེག་པ་རིམ་པ་དགུ་ནི་གང་ཟག་གཅིག་གི་རྒྱུད་ཀྱི་ཉམས་སུ་ལེན་ཚུལ་གྱི་དབང་དུ་བྱས་སོ། །གསུངས་པ་ལྟར་འདྲ། །༈ རྡོ་རྗེའི་གསུང་༤པ། ཆོས་ཀྱི་འཁོར་ལོ་གསུམ་འཁོར་གྱི་རྟོགས་པའི་ཁྱད་པར། བྱ་བ་འདི་གལ་ཆེ་གསུངས། །མདོར་ན་ཞལ་སྔ་ནས། གདུལ་བྱ་རྣམས་ཀྱི་རྟོགས་པ་གོང་ནས་གོང་དུ་འཁྲིད་ཅིང་བོགས་དབྱུང་བའི་ཕྱིར་དེ་དང་མཐུན་པའི་ཁྲིད་ཀྱི་རིམ་པ་བསྟན། གསུངས། །འོན་ཏེ་འདིར་འཁོར་ལོ་ཐ་མ་ངེས་དོན་ལ་གོ་བ་ལས་ལེགས་པར་རྣམ་ཕྱེ་གོ་མི་རུང་། །༈ རྡོ་རྗེའི་གསུང་༥པ། ཆོས་ཀྱི་འཁོར་ལོ་རེ་རེ་ལ་ཡང་གསུམ་ཀ་ཚང་། བྱ་བ་རྒྱས་པ་འགྲེལ་པར་གཟིགས། དཔེ་མཚོན་ཙམ་བརྗོད་ན། འཁོར་ལོ་དང་པོ་བདེན་བཞི་ནི་བཀའ་དང་པོ། དེའི་འགོག་བདེན་མཐར་ཕྱིན་པ་བཤད་པ་ནི་བཀའ་བར་པ་མཚན་ཉིད་མེད་པ། །དེའི་ལམ་བདེན་མཐར་ཕྱིན་པ་བཤད་པ་ནི་བཀའ་ཐ་མ་ངེས་དོན་ཡིན་ཞེས་གངས་ཅན་མགོན་པོས་རྒྱུན་དུ་གསུངས་པ་རང་གི་རྣ་བར་འཇག་པ་ཞིག་ཡིན། །༈ རྡོ་རྗེའི་གསུང་༦པ། ཆོས་ཀྱི་འཁོར་ལོ་ཕྱི་མ་ཕྱི་མའི་ས་བོན་སྔ་མ་སྔ་མ་ལ་གནས། བྱ་བ་གོང་མ་ཐག་མ་དང་འབྲེལ་ཞིང་དཔེར་མཚོན་ཙམ་ལ། བཀའ་ཐ་མ་བདེ་གཤེགས་སྙིང་པོའི་སྤྲོས་བྲལ་གྱི་ཆ་བཀའ་བར་པར་ཤིན་ཏུ་གསལ་བ་ལྟར་རོ། །༈ རྡོ་རྗེའི་གསུང་༧པ། མདོ་དང་དོན་གྱི་གནད་ཀྱིས་འཁོར་ལོ་གསུམ་དུ་ངེས། བྱ་བ་ནི། བཀའ་འམ་འཁོར་ལོ་ཐོག་མཐའ་བར་གསུམ་དུ་ཕྱེ་བ་ནི་དུས་སྔ་ཕྱི་བར་གསུམ་སོགས་ཀྱིས་མི་ཕྱེ་བར་ མདོ་དང་དོན་གྱི་གནད་ཀྱིས་འཁོར་ལོ་གསུམ་དུ་ཕྱེ་བར་ངེས་གསུངས་སོ། །ཞེས་པ་ནི་གོང་གི་ཆད་པ་ཁ་བསྐང་གི་ཆེད་དུའོ། །